Газар олголтыг гурван чиглэлд хуваахаар Газрын багц хууль, түүнд холбоотой хууль, тогтоомжид өөрчлөлт оруулах төслийг боловсруулж УИХ-д өргөн барихаар бэлтгэсэн тухай ХЗДХ-ийн сайд Х.Нямбаатар өнөөдөр мэдээлэв. 

Тэрбээр, Авлигын индексийг бууруулах ажлын багийг ахалдаг бөгөөд долоо хоног бүр Засгийн газрын хуралдаанд тус ажлын багийн хэрэгжүүлж буй ажлыг тайлагнадаг билээ. Энэ хүрээнд дээрх хуулийн төслийг боловсруулж Засгийн газрын хуралдаанд танилцуулахаар болсноо тайлагнасан байна. 

Нэгдүгээрт, иргэнд олгодог 0.07 га газрыг үнэгүй болгох, түүнтэй холбоотой төлөвлөлтийг жилийн өмнө хийж, тухайн жилд цахимд нээлттэй болох юм. Ингэснээр, иргэд координат нь цахим нээлттэй тавигдсан газрыг авахаар хүсэлт гаргах тогтолцоо бүрдэх аж.

Мөн 0.07 га-гаас бусад төрлийн газрыг зөвхөн биечилсэн болон цахим дуудлага худалдаагаар борлуулахаар хуулийн төсөлд тусгажээ. Тухайлбал, дугуй засвар, цайны газар, аялал жуулчлал, газар тариалан, үйлдвэр, аж ахуйн гэх мэт бүх төрлийн газрыг цахим дуудлага худалдаанд оруулж, координатын байршлыг суурь үнийн хамт байршуулна. 

Иргэд egazar.gov.mn цахим хуудсанд нэвтэрснээр дуудлага худалдаанд оролцох боломжтойг ХЗДХ-ийн сайд Х.Нямбаатар онцоллоо. Цахимаар шийдвэр нь гарч газар өмчлөх тохиолдолд цахимаар QR код бүхий гэрчилгээгээ хэвлэн авах боломжтойг тэмдэглэв. 

Харин төр өөрийн ажлыг хэрэгжүүлэх зорилгоор өөртөө газар олгох хэлбэрийг хуулийн төсөлд тусгаад байна.