"Оскар"-т нэр дэвшиж чадаагүй дуучин, жүжигчин Лэди Гага Нью Йоркийн кино шүүмжлэгчдийн хүрээлэнгээс "Шилдэг эмэгтэй жүжигчин"-ний шагнал хүртжээ.

 Өнгөрсөн лхагва гарагт түүнд шагналыг нь гардуулан өгсөн бөгөөд сэтгэл нь хөдөлсөн Лэди Гага нулимс дуслуулан, бүгдэд талархал илэрхийлжээ.

 Түүнийг олон хүмүүс "Оскар"-т нэр дэвшинэ хэмээн таамаглаж байсан ч харамсалтай нь тийм зүйл болоогүй. Бодит явдлаас сэдэвлэн бүтээсэн "House Of Gucci" кинонд гол дүр бүтээсэн тэрээр "Би өөрийнхөө ярьж байгааг ч сонсож чадахгүй нь. Та бүхэн гэр бүлийн минь бүсгүйчүүдийг мэддэг боллоо. Би тэднээр дамжуулан дүрийнхээ зүрх сэтгэлийг, түүний авах ёстой бүхнийг бүтээж чадсан гэж бодож байна" хэмээсэн байна.

 Итали гаралтай Лэди Гага ээж, эмээ нараасаа жинхэнэ Итали хүн байх арга барилыг суралцжээ. Тэрээр "Энэхүү дүрийг бүтээхэд тусалсан гэр бүлийн бүсгүйчүүддээ баярлалаа. Итали ээж нар минь надад хатуу чанга, тэсвэр тэвчээртэй байхыг сургасан. Та надад айдасгүй байхыг зааж өгсөн. Үгүй гэж хэзээ ч хариулж болохгүй. Хэн нэгэн үгүй гэж хэлэх юм бол тийм гэж хэлэх нэгнийг хайж олоорой гэж сургасан. Мөн эгч минь надад зоригтой байж, арга зам олоход сургасан. Эдгээр эмэгтэйчүүд л надад эрэгтэй хүмүүсийн ертөнцөд агуу мэдрэмжтэй байхад сургасан бөгөөд мэдрэмж өндөртэй байх нь хамгийн үзэсгэлэнтэй зүйл юм" хэмээн талархлаа илэрхийлжээ.