СӨҮЛ. /Yonhap/. БНАСАУ Япон тэнгисийн чиглэлд ойрын зайн тусгалтай хоёр баллистик пуужин харважээ. Пуужингууд 230 км зайд ниссэн байна. Энэ тухай БНСУ-ын Штабуудын дарга нарын хороо мэдэгджээ.

 “Yonhap” агентлагийн мэдээлснээр, БНАСАУ-ын Вонсан хот орчмоос орон нутгийн цагаар 06:10 цагт харвасан баллистик пуужингууд 30 километрийн өндөрт хүрч нисжээ.

Баллистик пуужин харвасантай холбогдуулан БНСУ-ын цэргүүд мэдэгдэхдээ, шинэ коронавирусний тархалтын улмаас дэлхий дахин хүнд үеийг туулж буй энэ үед БНАСАУ зохисгүй үйлдэл гаргаж байна хэмээгээд үүнийгээ нэн даруй зогсоохыг бид уриалж байна гэжээ. 

Өмнө нь “NHK” телевиз мэдээлэхдээ, БНАСАУ-ын харвасан ойрын зайн тусгалтай хоёр баллистик пуужин Японы эдийн засгийн онцгой бүсэд хүрээгүй гэжээ. Түүнчлэн БНАСАУ-ын эрх баригчдын явуулж буй туршилтуудын талаарх мэдээллийг цуглуулах хямралын штаб Японд байгуулагдсан тухай мэдээлсэн байна. Одоогоор Японы цэргүүд пуужин харвасан тухай мэдээлэлд нарийн дүн шинжилгээ хийж байгааг Японы Батлан хамгаалахын сайд Таро Коно цохон тэмдэглэжээ.