СӨҮЛ. /Yonhap/. Эдийн засагт коронавирусний халдварын тархалтын үзүүлэх нөлөөг бууруулах үүднээс улсын нийт өрхийн талаас илүү хувьд дэлгүүрийн купон, эрхийн бичиг тараахад зориулан 7.1 их наяд вон буюу 5.8 тэрбум ам.долларын хоёр дахь нэмэлт төсвийг шаардана гэж БНСУ-ын Засгийн газар даваа гарагт мэдээллээ.

Мөн БНСУ-ын бага орлоготой 14 сая өрхөд тусламж үзүүлэхийн тулд 9.1 их наяд воны тусламжийн багц гаргахаар төлөвлөжээ. “Уг төлөвлөгөөний хүрээнд дөрөв болон түүнээс дээш гишүүнтэй, өрхийн орлогоороо доогуур эрэмбэлэгддэг өрх тус бүрт нэг сая вон өгнө” гэж Санхүү, эдийн засгийн яам мэдээлсэн байна.

Засгийн газар хямралыг дуусах хүртэл бүх нөөцөө дайчилж, шийдэмгий, хурдан ажиллах амлалт өгсөн гэж Сангийн сайд Хон Нам Ки мэдэгджээ. Түүний хэлснээр, Засгийн газар хүмүүст шаардлагатай тохиолдолд нэмэлт тусламжийг үзүүлэхэд бэлэн байгаа ажээ.

Нэг гишүүнтэй өрхүүдэд 400 мянган вон, хоёр гишүүнтэй өрхүүдэд 600 мянган вон, гурван гишүүнтэй өрхүүдэд 800 мянган вон олгоно. Хон Нам Кигийн мэдээлснээр, зарцуулалтыг нэмэгдүүлэхийн тулд бэлэн мөнгөний оронд дэлгүүрийн хөнгөлөлт эсвэл эрхийн бичиг олгох ажээ.

Засгийн газар нэмэлт төсвийн хуулийн төслийг Үндэсний ассамблейд ойрын хугацаанд өргөн барих бөгөөд парламент 11.7 их наяд воны төсвийн төлөвлөгөөг хэдийн баталсан байна. Тусламжийн сүүлийн арга хэмжээ нь “COVID-19” цар тахлаас үүдэлтэй цочролыг зохицуулах зорилготой юм.

БНСУ-д халдварын улмаас 158 хүн нас барсны дийлэнх нь өндөр настай, суурь өвчтэй хүмүүс байсан бөгөөд тус улсад нийт 9661 хүн халдвар авчээ.