ПЁНЬЯН. /Yonhap/. БНАСАУ олон нийтийн анхаарлыг ихэд татаж байсан парламентын чуулганыхаа талаар өдийг хүртэл мэдээлээгүй байгаа нь коронавирусний халдвартай тэмцэж буй энэ үед уг чуулганыг цуцалсан юм уу хойшлуулсан байж магадгүй гэж таамаглахад хүргэжээ.

Ардын дээд хурлын чуулган баасан гарагт болох төлөвтэй байсан боловч энэ талаар одоогийн байдлаар ямар нэгэн мэдээ гараагүй байна. БНАСАУ-ын олон нийтийн хэвлэл мэдээллийн хэрэгслүүд парламентын чуулган гэх мэт томоохон үйл явдлын талаарх мэдээллийг тухайн арга хэмжээ болсон өдрийн орой юм уу маргааш өглөө нь мэдээлдэг ажээ.

“COVID-19” халдвар тархахаас урьдчилан сэргийлэхийн тулд бүхий л хүчин чармайлтыг гаргаж байгаагаа үл харгалзан парламентын чуулганыг зохион байгуулахаар төлөвлөж байна гэж БНАСАУ өнгөрсөн гуравдугаар сарын дундуур мэдэгджээ. Энэ удаагийн чуулганы хамрах хүрээг өнгөрсөн жилүүдийнхээс бууруулна хэмээн олон нийт таамаглаж байжээ.

Бямба гаргийн үдийн байдлаар Солонгосын төв цахилгаан мэдээний агентлаг, “Rodong Sinmun” сонин зэрэг БНАСАУ-ын хэвлэл мэдээллийн хэрэгслүүдийн аль нь ч Ардын их хурлын чуулган болсон эсэх болон үүнээс гарсан үр дүнгийн талаар мэдээлээгүй байна.

Үүнтэй холбоотойгоор чуулган цуцлагдсан эсвал хойшлогдсон байж магадгүй хэмээн олон нийт таамаглаж байгаа бол зарим нь хуралд оролцогчдын дундаас халдвар илэрсний улмаас цуцалсан байж болзошгүй гэх таамаглалыг дэвшүүлжээ. Мөн чуулган өдийг хүртэл үргэлжилж байгаа тул хараахан мэдээлээгүй байж магадгүй гэж зарим шинжээч үзэж байна.

БНАСАУ нь коронавирусний халдвар илрээгүй байгаа цөөн улс орнуудын нэг хэдий ч гадаадын ажиглагчдын үзэж буйгаар, Пёньян тархалтын талаарх мэдээллийг нуун дарагдуулж байж болзошгүй ажээ. Пёньян халдварын тархахаас урьдчилан сэргийлэх үүднээс өнгөрсөн 12 дугаар сарын сүүлээр халдвар анх дэгдсэн БНХАУ-тай залгаа хилээ хаах гэх мэт шийдэмгий арга хэмжээнүүдийг хэрэгжүүлсэн юм. Мөн улс даяар хөл хорио тогтоож, хүмүүсийн зорчих хөдөлгөөнийг хязгаарлажээ.

Энэ удаагийн парламентын чуулганаар коронавирусний цар тахлын үзүүлэх нөлөөг бууруулах арга хэмжээнүүдийн талаар голчлон хэлэлцэнэ гэж ажиглагчид тооцоолж байжээ. Мөн БНАСАУ-ын удирдагч Ким Жөн Ун, АНУ-ын Ерөнхийлөгч Дональд Трамп нарын өнгөрсөн оны дээд хэмжээний уулзалт тохиролцоонд хүрэлгүйгээр өндөрлөснөөс хойш цөмийн хэлэлцээ зогсонги байдалд орсон энэ үед Пёньянаас АНУ-д хандан мэдэгдэл хийж магадгүй гэж таамаглаж байсан юм.