БНСУ коронавирусний халдварт өвчний эмчилгээнд зориулагдсан 7 эмийн эмнэлзүйн туршилтыг явуулж байгаа тухай тус улсын Засгийн газрын төлөөлөгч мэдэгджээ.

Эмнэлзүйн туршилт эерэг үр дүнг харуулвал энэ оны эцэс гэхэд коронавирусний эсрэг үр дүнтэй эмийг гарган авах боломжтой болох аж. 2020 оны эцсээр гурван төрлийн вакцины эмнэлзүйн туршилтыг эхлүүлэх бол найдвартай вакцин 2021 оны эцэс гэхэд гарах боломжтойг “Yonhap” агентлаг цохон тэмдэглэжээ.

Туршилтын үйл явцыг хурдасгахын тулд судалгаа шинжилгээ, эмнэлзүйн туршилт явуулах зорилгоор цусны дээж авахыг Засгийн газар Улаан Загалмайн нийгэмлэгт зөвшөөрчээ. Өмнө нь ингэхийг зөвхөн тодорхой эмнэлгүүдэд зөвшөөрдөг байжээ.

Судалгааг явуулахын тулд хувийн компаниуд биологийн аюулгүй байдлын 3 дугаар түвшний лабораториудыг нээхээр төлөвлөж байна. 

montsame.gov.mn