БНАСАУ-ын эрх баригчид ухуулах хуудас илгээсний хариуд БНСУ-тай харилцаа холбооны бүх шугамаа мягмар гаргаас эхлэн хааж байгаа тухай Солонгосын төв цахилгаан мэдээний агентлаг /KCNA/ мэдээлэв.

"Энэхүү алхам нь Өмнөд Солонгостой холбогдох бүх арга хэрэгслийг бүрэн устгах, бусад шаардлагагүй үйлдлүүдийг зогсоох шийдвэрийн жагсаалтын эхнийх болно" гэж мэдээнд дурджээ.

KCNA агентлагийн мэдээлж буйгаар, хоёр улсын хоорондох телефон утасны бүх шугамыг мягмар гарагт орон нутгийн цагаар 12:00 цагаас эхлэн хаана. Ийм шийдвэрийг Солонгосын хөдөлмөрийн намын /СХН/ Төв хорооны орлогч дарга Ким Ён Чоль, СХН-ын Төв хорооны хэлтсийн нэгдүгээр орлогч дарга Ким Ё Жон нарын оролцсон зөвлөгөөний үеэр гаргажээ. “Өмнөдтэй хамтран хийж буй ажил дайсны эсрэг тэмцэл болж хувирах ёстой” гэж тэд хурлын явцад мэдэгдсэн байна. “Түүнчлэн урвагчид, хууран мэхлэгчдээр гэмт хэрэг үйлдсэнийх нь төлөөсийг төлүүлэхийн тулд дайснуудын эсрэг хэрэгжүүлэх үе шаттай үйл ажиллагааны төлөвлөгөөг хэлэлцсэн бөгөөд дараа нь эхний алхам болгон Умард болон Өмнөдийн хоорондох харилцаа холбооны бүх шугамыг хаах зааварчилгаа өглөө” гэж КСNА агентлагийн мэдээнд цохон тэмдэглэсэн байна.  

БНАСАУ-ын эрх баригчид Өмнөдийн зүгээс Умард руу ухуулах хуудсууд илгээсний хариуд Кэсон дахь Солонгос хоорондын харилцаа холбооны газрыг хаах асуудлыг хэлэлцэхээр төлөвлөж байгаа талаараа зургадугаар сарын 5-нд мэдээлжээ.

Үүний хариуд БНСУ-ын Үндэстнээ нэгтгэх яам орон нутгийн олон нийтийн байгууллагуудад хандан Умардын эсрэг ухуулах хуудас тараахаа зогсоохыг уриалж, ийм үйлдлийг хууль ёсны дагуу хориглохоо амласан байна.

https://montsame.mn/mn/read/227849