Өнөөдөр 2020.06.09. Энэ оны 160 дахь өдөр бөгөөд он дуусахад 205 хоног үлдэж байна. Монгол эх оронд маань нар 04 цаг 53 минутад мандлаа. 20 цаг 50 минутад жаргана.

Улаанбаатар хотод бороо шивэрнэ. Өдөртөө 16 хэм, шөнөдөө 1 хэмийн дулаан байна. Та хувцсаа тохируулж өмсөөд гараарай.

Өнөөдөр Угандад Үндэсний баатруудын өдөр бол Өмнөд Америк, Уругвайд Өмнөд Америкийн хөл бөмбөгийн өдөр тохиож байна.

Өнөөдөр Их Британийн гитарчин, “Uriah Heep” хамтлагийг үүсгэн байгуулагч Мик Бокс, Канадын жүжигчин, Алтан бөмбөрцгийн шагналт, Эммигийн гурван удаагийн шагналт Майкл Жей Фокс, Америкийн жүжигчин, Алтан бөмбөрцгийн шагналт Жонни Депп, Германы хөл бөмбөгч Мирослав Клозе, Америк, Израилийн жүжигчин Натали Портман, Английн жүжигчин Лорен Сока зэрэг алдартан төрсөн өдрөө тэмдэглэж байна.

Энэ өдөр дэлхий дахинд болсон онцлох үйл явдлууд:

1963: Уинстон Черчилль АНУ-ын Хүндэт иргэн болов.

1969: Брайан Жонс “Роллинг Стоунс”-аас гарч буйгаа мэдэгдэж, түүний оронд Мик Тэйлор оржээ.

1993: АНУ-д Стивен Спилбергийн “Юрийн галавын цэцэрлэг” кино дэлгэцнээ гарсан байна.

1994: Казахстаны Ерөнхийлөгч Нурсултан Назарбаев тус улсын нийслэлийг Алма-Атыгаас Астана руу шилжүүлэх талаараа мэдэгджээ. Казахстаны нийслэл Астана хот нь 2019 оноос Нур-Султан болсон юм.

1995: Украины Ерөнхийлөгч Леонид Кучма болон ОХУ-ын Ерөнхийлөгч Борис Ельцин нар Сочи хотноо Хар тэнгисийн флотыг хуваах тухай гэрээнд гарын үсэг зуржээ.

Өнөөдөр үс засуулбал сайн нөхөртэй нөхөрлөнө гэжээ.

Энэ өдөр гахай, туулай жилтнүүд аливаа үйлийг хийхэд эерэг сайн бол бич, тахиа жилтнүүд аливаа үйлд хянамгай хандаарай. Өнөөдөр угаал үйлдэх, мал худалдаж авах, их хүмүүнтэй уулзахад сайн бол архи уух, тамхи татах, сэтгэл муутантай нөхөрлөх, сахил санваар авах, хануур төөнүүр хийлгэх, балгадын суурь тавих, нохой худалдаж авахад тохиромжгүй. Хол газар явах гэж байгаа бол зүүн хойш мөрөө гаргаад аян замдаа гараарай. Таны аяны болон амьдралын ганзага үргэлж дүүрэн байг.

Өнөөдрийн ажилд тань амжилт хүсье.