Эрэгтэйчүүдийн 73 кг-ын жинд залуучуудын ДАШТ-ий хошой мөнгөн медальт, Ази тивийн аварга ОУХМ Цэнд-Очирын Цогтбаатар алтан медаль хүртэж, Монгол улс 2 алт, 2 мөнгөн медальтай нийт 71 улсаас хоёрдугаарт эрэмблэгдэж байна. Ингэснээр тэрбээр чансаагаа 1000 оноогоор ахиулснаар -73 кг-ын дэлхийн чансаанд 11 дүгээр байр руу дэвших боломжтой болсон байна.

Ц.Цогтбаатар тэмцээний эхний тойрогт хийлж, хоёрын даваандаа Европын залуучуудын аваргын мөнгөн медальт Португалийн Жоао Фернандог 2:56 минутад цэвэр ялсан.

Дараагийн тойрогт Узбекистаны бөх, залуучуудын Азийн цомын тэмцээний хошой аварга Голибжон Сулаймоновыг 3:13 минутад иппон ялав.

Хэсгийн аваргын төлөө 2019 оны Екатринбургын Их Дуулгын хүрэл медальт ОХУ-ын Евгений Прокопчукыг вазари үнэлгээгээр ялсан.

Хагас шигшээд Узбекистаны Обидхон Номоновыг нэмэлт цагт торгуулиар ялжээ.

Финалд 2020 оны Парисын Их Дуулгын мөнгөн медальт Казахстаны Жансай Смагуловтой барилдан, торгуулиар ялж, Их Дуулга ангилалд хоёр дахь удаагаа түрүүллээ.