БНСУ-ын Гадаад хэргийн дэд сайд Чой Жон Кун Монгол Улсаас БНСУ-д суугаа шинэ Элчин сайд Н.Эрдэнэтуяаг гуравдугаар сарын 29-нд хүлээн авч уулзжээ.

Талууд Солонгос-Монголын харилцааны талаар болон “COVID-19” цар тахалтай тэмцэх хамтын ажиллагаа, Халдварт өвчнийг хянах, нийгмийн эрүүл мэндийг хамгаалах Зүүн Хойд Азийн хамтын ажиллагааны санаачилгын талаар санал бодлоо солилцов.

Чой Жон Кун өнгөрсөн онд “COVID-19”-ийн нөхцөл байдал хүнд байсныг үл харгалзан Солонгос, Монгол дипломат харилцаа тогтоосныхоо 30 жилийн ойг тохиолдуулан олон салбарын хамтын ажиллагаагаа өргөжүүлэн гүнзгийрүүлсэнд баяртай байгаагаа илэрхийлээд, халдварын нөхцөл байдлыг харгалзан хоёр орны Гадаад хэргийн дэд сайд нарын түвшний стратегийн яриа хэлэлцээг хийх зэргээр өндөр түвшний уулзалтуудыг үргэлжлүүлэхийг санал болгожээ.

БНСУ-ын Гадаад хэргийн дэд сайд мөн “COVID-19”-тэй тэмцэхэд хоёр улс нягт хамтран ажиллаж буйг цохон тэмдэглэжээ. Мөн өнгөрсөн онд дэвшүүлсэн “Халдварт өвчнийг хянах, нийгмийн эрүүл мэндийг хамгаалах Зүүн Хойд Азийн хамтын ажиллагааны санаачилга”-д Монголын тал идэвхтэй оролцож буйд талархал илэрхийлээд, үргэлжлүүлэн хувь нэмрээ оруулж, хамтран ажиллахыг хүссэн байна.

Үүний хариуд Элчин сайд Н.Эрдэнэтуяа, хоёр орны харилцааны шинэ 30 жил эхэлж буй энэ чухал цаг үед Солонгост суугаа Элчин сайдын албан тушаалыг хашиж буйгаа онцлон тэмдэглээд, бүрэн эрхийн хугацаандаа хоёр орны дипломат төлөөлөгчдийн харилцааг бэхжүүлэх зэргээр хоёр улсын харилцааг улам өндөр түвшинд гаргах чиглэлд хүчин чармайлт гаргана гэдгээ мэдэгджээ.