БНАСАУ-ын хөлөг онгоцны үйлдвэрт 3000 тоннын усан түрцтэй шумбагч онгоц бүтээх ажил дууссан гэж  "Yonhap" агентлаг БНСУ, АНУ-ын тагнуулын мэдээллээс эш татан мэдээлжээ. 

“БНАСАУ 3000 тоннын усан түрцтэй шумбагч онгоцоо аль хэдийнэ бүтээж дуусгасан гэж БНСУ, АНУ-ын тагнуулын байгууллагын аль аль нь үзэж байгаа” гэж агентлагийн эх сурвалжууд хэлсэн байна. Ийм шумбагч онгоц бүтээж байгаа тухай 2019 онд долоодугаар сард мэдээлж байсан юм. Эх сурвалжуудын нэгийнх нь мэдээлснээр, БНАСАУ-ын эрх баригчид АНУ-д үзүүлэх шахалтаа нэмэгдүүлэх зэрэг стратегийн томоохон нөлөө бүхий энэхүү шумбагч онгоцыг үзүүлэх “тохиромжтой үеийг сонгож байгаа аж”.

“Yonhap” агентлагийн мэдээлснээр, шинэ шумбагч онгоцыг үзүүлэх үеэр БНАСАУ баллистик пуужин туршиж магадгүй байна.

БНАСАУ-ын эрх баригчид шумбагч онгоцноос баллистик пуужин харвах туршилтад бэлтгэж байж магадгүй гэж Вашингтоны Стратеги, олон улсын судалгааны төвийн шинжээчид өнгөрсөн долоо хоногийн мягмар гарагт мэдээлсэн юм.