Хэт холын зайн гүйлтийн олон улсын тэмцээний долоон удаагийн аварга Бямбаагийн Буджаргал  энэ сарын 20-26-нд АНУ-ын Висконсин мужийн Милуоки хотын "Petit national ice center"-т зохион байгуулагдсан зургаан өдрийн хэт холын зайн гүйлтийн тэмцээнд оролцож байгаа талаар бид өмнө нь мэдээлсэн.

Уг тэмцээний оролцогчид АНУ-ын төдийгүй дэлхийн рекордыг шинэчлэн тогтоох боломжтой учир хэт холын зайн гүйгчид, тамирчдын хүсэн хүлээдэг тэмцээн гэдгээрээ онцлогтой юм. Тус тэмцээнд Монгол Улсаа төлөөлөн оролцсон Б.Буджаргал 2038 тойрог хийж, 904 км зам туулснаар аваргаллаа.

Түүнчлэн зургаа хоногийн хугацаанд 900 км-ээс их зам туулсан дэлхийн 21 дахь хүн болсон байна. Үүнээс гадна хэт холын зайн Ази тивийн рекорд 834 км байсныг 70 км-ээр шинэчилснээс гадна тус тэмцээний дээд амжилт 835 км байсныг 69 км-ээр шинэчлэн тогтоож, хэт холын зайн гүйлтийн олон улсын тэмцээний найман удаагийн аварга боллоо.