МАН-ын XI Бага хурлаар тус намын орон тооны нарийн бичгийн даргаар Намын байгуулалтын газрын дарга Н.Энхбаатар, Хэвлэл мэдээлэл, Цахим бодлогын газрын дарга Ц.Чулуунзагд, МАХН-ын Ерөнхий нарийн бичгийн дарга асан Б.Тулга нарыг томилсон байна.

Харин орон тооны бус нарийн бичгийн даргаар УИХ-ын гишүүн Д.Сарангэрэл томилжээ.   

Ташрамд дурдахад, энэ сарын 25-26-нд болсон уг бага хурлаар тус намын даргаар ажиллаж байсан У.Хүрэлсүхийг намын гишүүнчлэлээс түдгэлзүүлж, Монгол Улсын 32 дахь Ерөнхий сайд Л.Оюун-Эрдэнийг намын даргаараа сонгосон билээ. Тус намын даргаар ажиллаж байсан У.Хүрэлсүх энэ сарын 9-нд болсон Монгол Улсын Ерөнхийлөгчийн ээлжит сонгуулийн дүнгээр Төрийн тэргүүнээр сонгогдож, тангараг өргөсөн. Ерөнхийлөгч нь Ерөнхий сайд, Улсын Их Хурал, Засгийн газрын гишүүн, хуулиар тогтоосон үүрэгт нь үл хамаарах бусад ажил, албан тушаал хавсарч болохгүй бөгөөд хэрэв өөр ажил, албан тушаал эрхэлж байгаа бол Ерөнхийлөгчийн тангараг өргөсөн өдрөөсөө эхлэн уг ажлаасаа чөлөөлөгдөх хуулийн заалттай юм.