УИХ-ын дарга Г.Занданшатар АНУ-аас Монгол Улсад суугаа Элчин сайдын яамны Дэд тэргүүн Грегори Мэй тэргүүтэй төлөөлөгчдийг өнөөдөр хүлээн авч уулзав.

Уулзалтын эхэнд Улсын Их Хурлын дарга Г.Занданшатар Монгол Улс, АНУ-ын Олон улсын худалдаа, хөрөнгө оруулалтын асуудлаар ил тод байдлыг хангах тухай хэлэлцээр (Ил тод байдлын хэлэлцээр)-ийн хэрэгжилтийн явцын талаар санал солилцохоор холбогдох албан тушаалтнууд оролцож байгаад талархал илэрхийлэв.

Тэрбээр, УИХ болон Засгийн газар Ил тод байдлын хэлэлцээрт тусгагдсан үүрэг, даалгавараа хэрэгжүүлэхийн төлөө ажиллаж байгаа бөгөөд Монгол Улсын олон улсын гэрээ, хэлэлцээр нь УИХ-аас батлан гардаг хуультай нэгэн адил хүчин төгөлдөр. Ил тод байдлын хэлэлцээрээр олон улсын худалдаа, хөрөнгө оруулалттай холбоотой хууль тогтоомжийн талаар олон нийтэд мэдээлэх, санал авах, хэвлэн нийтлэх, авилгатай тэмцэх зэрэг чиглэлээр харилцан мэдээлэл өгөх боломжийг бүрдүүлсэн нь гадаадын хөрөнгө оруулалтыг татахад чухал ач холбогдолтой болно" гэв.

АНУ-ын Элчин сайдын яамны Дэд тэргүүн Грегори Мэй, УИХ-ын даргыг цаг зав гарган хүлээн авч уулзаж байгаад талархал илэрхийлээд 2013 онд Монгол Улс, АНУ Ил тод байдлын хэлэлцээрт гарын үсэг зурж, 2017 онд хүчин төгөлдөр болсон хэмээн товч танилцуулав. Тэрбээр, Хууль тогтоомжийн тухай хууль, Нийтийн мэдээллийн тухай хууль нь тус хэлэлцээрийн хэрэгжилтэд чухал ач холбогдолтой болох тул энэ талаар мэдээлэл авах сонирхолтой байгаагаа илэрхийлэв. Уг хэлэлцээрийг хэрэгжүүлж дуусахад хүчин чармайлт шаардсан дөрвөн жил болох ба ирэх жил гэхэд үр ашгаа өгнө гэдэгт найдаж байна гэлээ.

Хэлэлцээрийн хэрэгжилттэй холбогдуулан ХЗХЯ-ны Төрийн нарийн бичгийн дарга Б.Баасандорж, "Хэлэлцээрийг эрчимжүүлэх хүрээнд 2017 онд УИХ-ын Тамгын газрын Ерөнхий нарийн бичгийн дарга, Засгийн газрын Хэрэг эрхлэх газрын Тэргүүн дэд дарга, ГХЯ болон ХЗХЯ-ны Төрийн нарийн бичгийн дарга нарын хамтарсан тушаал гарсан. Уг тушаалын хүрээнд журам батлагдаж, гадаадын хөрөнгө оруулалттай холбоотой олон улсын гэрээ, хэлэлцээрийн орчуулгыг ГХЯ, УИХ-д өргөн баригдсан хуулийн төслийг ЗГХЭГ, батлагдсан хуулийн төсөл болон холбогдох журмын англи хувилбарыг ХЗДХЯ хариуцан www.legalinfo.mn цахим хуудсанд байршуулж байна. Өнөөдрийн байдлаар 110 гаруй хууль англи хэл дээр орчуулагдаж, тус цахим хуудсанд байршуулагдсан, үүнээс 43 хууль Ил тод байдлын хэлэлцээртэй шууд холбоотой" гэв.

Тэрбээр үрэлжлүүлэн Хууль тогтоомжийн тухай хууль болон Нийтийн мэдээллийн тухай хуулийн талаар мэдээлэл өглөө. Нийтийн мэдээллийн тухай хуулийг энэ оны хаврын чуулганы хугацаанд өргөн мэдүүлж, Улсын Их Хурлаас хэлэлцэх эсэхийг шийдвэрлэсэн, ажлын хэсэг уг хуулийн төсөл дээр ажиллаж байгаа. Хууль тогтоомжийн тухай хуулийн төслийг энэ оны намрын чуулганы хугацаанд өргөн баригдахаар ажиллаж байна. Уг хуулийн төсөлд Ил тод байдлын хэлэлцээрийг эрчимжүүлэх заалт тусгасан гэв.

Талууд үргэлжлүүлэн Ил тод байдлын хэлэлцээртэй холбогдуулан хууль, эрх зүйн зохицуулалт, хуулийн орчуулга, цахим платформ, техникийн шийдэл зэрэг бусад асуудлаар санал солилцов.