БНСУ-ын “K-pop” урсгалаар уран бүтээлээ туурвидаг “BTS” хөвгүүдийн хамтлагийн гишүүн Жиминий коронавирусний шинжилгээний хариу эерэг гарсан талаар тус хамтлагийн менежментийг хариуцдаг агентлаг даваа гарагт мэдээлжээ.

“Big Hit” энтертайнментын мэдээлснээр, Жимин мөн мухар олгойн мэс засалд орсон бөгөөд биеийн байдал нь тогтвортой байна. Түүнд хоолой, гэдэс өвдөх шинж тэмдэг илэрч, улмаар ням гарагт “PCR” шинжилгээгээр халдвар авсан нь тогтоогджээ.

Жиминий хоолой бага зэрэг хөндүүрлэсэн хэвээр байгаа ч өмнөхөөсөө сайжирч байгаа талаар энтертайнментын мэдэгдэлд дурджээ. Тэрбээр хамтлагийнхаа бусад гишүүнтэй ойрын хугацаанд уулзаагүй байна. Тус хамтлагийн гишүүн “RM”, Жин, Шюга нар “COVID-19”-өөр халдварлан бүрэн эдгэрч, тусгаарлалтаас гараад удаагүй байгаа юм.