Зарим хэвлэлээр ногоон автобусны хэрэгт УИХ-ын гишүүн Ж.Сүхбаатарыг яллагдагчаар татаж, бүрэн эрхийг түдгэлзүүлж шалгах талаар мэдээлсэн. Тэгвэл дээрх мэдээллийг АТГ-аас үгүйсгэлээ. Өөрөөр хэлбэл, тус газраас "Ногоон автобус"-ны хэрэгт хэрэг бүртгэлийн гурван хэрэг нээж, мөрдөн шалгах ажиллагаа явуулж байгаа аж. Гэхдээ уг хэрэгт Засгийн газрын сайд асан, УИХ-ын гишүүн Ж.Сүхбаатар болон Хотын дарга асан Д.Сумъяабазар нарыг яллагдагчаар татаагүй гэдгийг АТГ-ын дэд дарга Г.Азжаргал хэллээ.

Түүнчлэн УИХ-ын гишүүн Ж.Сүхбаатартай холбогдоход "ногоон автобус"-тай холбоотой асуудлаар АТГ-аас тайлбар, мэдүүлэг авсан, гэхдээ яллагдагчаар татаагүй гэдгийг хэллээ. Тэгвэл "Ногоон автобус"-ны хэрэгт "Тэнүүн-Огоо" компанийн захирал А.Ганхуяг, гүйцэтгэх захирал Ж.Эрдэнэбат, Нийслэлийн худалдан авах ажиллагааны газрын хэлтсийн дарга Б.Түмэнжаргал, тус хэлтсийн мэргэжилтэн Ш.Баярсүх нарыг цагдан хориод байгаа билээ.