Иргэний нийгмийн байгууллагын төлөөллөөс өмгөөлөгч Г.Батбаярын талаар мэдээлэл өгч байна.

Иргэний нийгмийн байгууллагын төлөөлөл хэвлэлийн хурлын эхэнд өмгөөлөгч Г.Батбаяр цаг бусаар нас барсанд эмгэнэл илэрхийлж нэг минут дуугүй зогсов. Тэд "Бидний дотны нөхөр өмгөөлөгч Г.Батбаяр бидний газар шороогоо хамгаалах тэмцэлд түших багана минь байж, хуульзүйн туслалцааг харамгүй хайрлаж байсан. Түүнийг цаг бусаар өнгөрсөнд ар гэр, төрөл төрөгсдөд нь эмгэнэл илэрхийлж байна. Өнөөдөр олон төрийн бус байгууллагад зарлал хүргэж, тэдний төлөөлөл хэвлэлийн хуралд оролцохоор ирлээ. Өмгөөлөгч Г.Батбаяр уул уурхай, газар шороогоо хамгаалах олон тэмцэлд манлайлан оролцож, эхлүүлсэн тэмцэлээ амжилтад хүргэхийн тулд мэдлэг чадвараа дайчилж ажилладаг байсан. Гадуур гараад байгаа цуу яриа шиг хүн байгаагүй" гэлээ.

Иргэний нийгмийн төлөөллийн хэлж буйгаар өмгөөлөгч Г.Батбаяр асар их хэмжээний дарамт шахалтад орсон байсан бөгөөд энэ талаараа тэдэнтэй хуваалцаж байсан гэнэ. Түүний үхэл улс төрийн аллага байж болзошгүй, үүнийг нуун дарагдуулж өнгөрөөж болохгүй гэдгийг иргэний нийгмийн төлөөлөл хэлж байна.