Монголын анхны сансрын технологийн хувийн компани "Ондо Спэйс" юмсын интернэт туршилт явуулах зорилгооор хоёр ширхэг 0.5U ангиллын хиймэл дагуулыг АНУ-аас энэ оны 3-р сард хөөргөсөн билээ.

ONDOSAT-OWL-1, ONDOSAT-OWL-2 нэртэй тус хоёр хиймэл дагуул задгай сансрын 550км-ийн өндөрт тойрог замд ажиллаж эхэлснээс хойш техникийн бүх туршилт амжилттай болсон хэмээн тус компанийн Технологи хариуцсан захирал, сансрын технологийн доктор Д.Амартүвшин мэдээллээ.

Ингэснээр мал амьтан, хөдөлгөөнт төхөөрөмжийн байршил, төлөв тогтоогч төхөөрөмжөө туршилтын журмаар зах зээлд нэвтрүүлэх ажил эхэлсэн байна. Тэргүүн ээлжинд огт сүлжээгүй газар мал сүргийн байршлыг тогтоох, том оврын тээврийн хэрэгсэлд зориулсан холын тээврийг хянах зэрэг үйлчилгээг арилжаанд нэвтрүүлэх ажээ. 

Цаашид олон улсын зах зээлд шууд экспортлох боломжтой уг үйлчилгээнүүдийг эхний ээлжинд зөвхөн Монгол Улсын газар нутаг дээр хэрэгжүүлэх ажээ.

Сансарт өөрсдийн хиймэл дагуулын системийг амжилттай ажиллуулсан учир Япон, АНУ, Солонгос зэрэг улсын сансрын технологийн компаниудтай хамтын ажиллагааг эхлүүлж, өөрсдийн зохион бүтээсэн системийг олон улсын компаниудад санал болгож эхэлжээ. Үүнд хиймэл дагуул бүтээж өгөх, бусдын арилжааны зорилготой хиймэл дагуулыг хамтран хөөргөх, газрын станцын үйлчилгээ үзүүлэх зэрэг юм.