Монгол Улсад Нисэх хүчин үүсэж хөгжсөний түүхт 100 жилийн ой маргааш тохионо.

Энэхүү түүхэн үйл явдлыг тохиолдуулан ОХУ-ын уран нислэгийн үзүүлбэрийн алдарт  “Стрижи” баг манай улсад ирэх гэж байна. Тодруулбал, тэд МиГ-29 загварын сөнөөгч онгоцоор агаарт гайхамшигтай, давтагдашгүй үзүүлбэрээ үзүүлэх аж.

Агаарын шоу “Буянт-Ухаа” нисэх онгоцны буудалд маргааш 09:00 цагт болох бөгөөд нийслэлийнхэнд нээлттэй гэдгээрээ онцлогтой.

Уран нислэг үзүүлбэр нь манай хоёр орны найрамдалт харилцаа, батлан хамгаалах салбарын хамтын ажиллагааг улам бэхжүүлж, залуу хойч үедээ эх оронч үзэл, нисэх хүчнийг сурталчлахад үнэтэй хувь нэмэр оруулах ажээ.

Энэ багийг 1991 оны тавдугаар сарын 6-нд Москвагийн ойролцоох Кубинка нисэх баазын шилдэг нисгэгчдээс бүрдсэн 234-р гвардын хорооны үндсэн дээр байгуулсан юм. Энэхүү өдөр багийнхан анхны өөрсдийн бэлгэ тэмдэг бүхий өндрийн хувцас, шинэ хамгаалах дуулга-шлемтэй болж, анхны тоглолтоо хийсэн түүхтэй. 

“Стрижи” баг олон үүрэгт өндөр маневр бүхий МиГ-29, МиГ-35 сөнөөгч онгоцоор бүлгийн болон ганцаарчилсан хүнд маневр, нарийн төвөгтэй пилотаж үйлдэж олон нийтэд сонирхуулдгаараа алдартай.  

МиГ-29 сөнөөгч онгоцны дээд хурд 2450 км/цаг байдаг бол нислэгийн өндөр 18013 метр ажээ. Нисэх хүчин үүсэн байгуулагдсаны 98 жилийн ойгоор манай улсад байдаг зургаан ширхэг МиГ-29 онгоцоор агаарын шоу үзүүлж байв. Тэгвэл 2019 онд Халх голын дайны ялалтын 80 жилийн ойгоор ОХУ-ын “Русские Витязи” багийнхан Су-30СМ загварын сөнөөгч онгоцоор Хүй долоон худагт агаарын шоугаа толилууж байсан юм.