ХӨСҮТ-д энэ сарын 12-нд коронавирусний сэжигтэй тохиолдлоор тусгаарлагдсан 20 хүний нэгээс нь коронавирусний халдвар илэрлээ. Ингэснээр Монгол Улсад шинэ коронавирусний халдварын тохиолдол 17 болж  байгааг ЭМЯ-ны ээлжит мэдээллийн үеэр ХӨСҮТ-ээс мэдэгдлээ.

Өнгөрсөн  өдөр нийт 232 шинжилгээ хийснээс ийнхүү нэг тохиолдол илэрч, бусад нь сөрөг  гарчээ. Энэ сарын 12-нд ОХУ-аас ирж Дархан-Уул аймагт ажиглалтад орсон 74, мөн ажиглах байранд байгаа БНСУ-аас ирсэн 110, Цэргийн төв эмнэлэгт тусгаарлагдсан 11, Сэлэнгэ аймагт тусгаарлагдсан 4 хүний шинжилгээнээс коронавирус илрээгүй байна. Мөн тандалтын шугамаар буюу уушгины хатгалгаагаар өвдсөн 13 хүнээс шинжилгээ авахад хариу сөрөг гарчээ.

ХӨСҮТ-ийн ерөнхий захирал Д.Нямхүү мэдээлэхдээ, “Нийт батлагдсан тохиолдлоос 4 хүн эдгэрч эмнэлгээс гарсан бол 13 хүн эмчлүүлж, хяналтад байна. Эмчилж эдгэрээд гарсан эхний 2 хүн тусгаарлах байранд 14 хоносон. Тэдэнд хоёр удаа давтан шинжилгээ хийхэд коронавирус илрээгүй хэдий ч гэртээ 14 хоног ажиглалт, хяналтад байна. Бид холбоо харилцаатай байж хяналтаа үргэлжлүүлнэ” хэмээв.

Өнөөдрийн байдлаар ХӨСҮТ-д 225 хүн ажиглалт, эмчийн хяналтад байна.