Золбин нохойн тоог бууруулах зорилгоор энэ жил 1500 нохойд үржил хязгаарлах мэс ажилбар хийж, гэр хорооллын эзэнтэй 20 мянга гаруй нохойг бүртгэлжүүлж вакцин, туулгад хамруулна.

Улаанбаатар хотын Захирагчийн ажлын албанаас Нийслэлийн мал эмнэлгийн газартай хамтран жил бүр золбин нохой, муурны тоо толгойг бууруулах зорилгоор 2016-2019 онуудад гэр хорооллын айл өрхийн 42172 нохойг бүртгэлжүүлж, вакцин туулгад хамруулах, үржил хязгаарлах ажлуудыг зохион байгуулсан юм.

2016 онд 1500, 2017 онд 2000, 2018 онд 1876, 2019 онд 1000 нохойд буюу нийт 6376 нохойд үржил хязгаарлах мэс ажилбар хийснээр 600 мянга гаруй эзэнгүй, золбин нохой бий болох эрсдлээс урьдчилан сэргийлсэн байна.

Нохой золбирох нь тэжээж буй иргэдийн хариуцлагатай шууд хамааралтай аж. Учир нь иргэд нохойгоо хашаанаасаа гаргаж сул тавьж байгаа нь хяналтгүй үржилд орох нөхцлийг үүсгэж, золбин нохойн механик өсөлтийг бий болгосоор байгаа юм. Мөн тэжээсэн нохойноосоо гарсан эм гөлөгийг төөрүүлж гудамжинд хаяж байгаа нь золбин нохойн тоо өсөхөд шууд нөлөө үзүүлж байна.

Иймд иргэд мал эмнэлгийн газарт хандаж тэжээж байгаа нохойн үржлийг хязгаарлуулах, нохойгоо хашаанаасаа гаргаж сул тавихгүй байхыг уриалж байна. Хэрэв иргэд энэ үүргээ биелүүлж чадвал хот золбин нохой, муургүй байх боломж байгаа юм байна.