БНАСАУ-ын удирдагч Ким Жөн Ун Ерөнхийлөгч агсан Ким Ир Сений таалал төгссөний 26 жилийн ойг тохиолдуулан Кымсусан Нарны ордонд зочиллоо гэж Солонгосын төв цахилгаан мэдээний агентлаг /KCNA/ өнөөдөр мэдээлэв.  

“KCNA” агентлагийн мэдээлснээр, Ким Жөн Ун өндөр албан тушаалтнуудын хамтаар хоёр удирдагчийн хөшөөнд хүндэтгэл үзүүлж, цэцэг өргөсөн ажээ. “Ким Жөн Ун бие даасан, хүчирхэг улсын шинэ түүхийг эхлүүлсэн удирдагчдад өндөр хүндэтгэл үзүүллээ” гэж уг мэдээнд тэмдэглэсэн байна.

Ким Жөн Уны өвөө, БНАСАУ-ын үүсгэн байгуулагч Ким Ир Сен 1994 оны долдугаар сарын 8-нд 82 насандаа таалал төгсжээ. Пёньян хотын зүүн хойд хэсэгт байрладаг Кымсусан ордонд Ким Ир Сен болон Ким Жөн Уны эцэг Ким Жөн Ир нарын шарил хадгалагддаг юм.