БНСУ БНАСАУ-тай яриа хэлэлцээ, хамтын ажиллагаагаа сэргээх болно гэж Үндэстнээ нэгтгэх сайд Ли Ин Ён мэдэгджээ.

Солонгос хоорондын яриа хэлэлцээг сэргээж, Пёньянд хүмүүнлэгийн тусламж үзүүлэх нь эхлэлийн цэг байх болно гэдгийг тэрбээр онцлон тэмдэглэхийн сацуу одоогоор хоёр улсын харилцаанд үүсээд буй мухардлаас гарах арга замыг хайхын тулд явуулах үйл ажиллагааныхаа талаар мэдэгджээ.

Солонгос хоорондын бодлогыг боловсруулахад илүү идэвхтэй байхыг тэрбээр хамт олондоо уриалахын зэрэгцээ энэ бодлогыг эцсийг нь хүртэл бодитой болгоно гэдгийг мэдэгдсэн байна. Үндэстнээ нэгтгэх яам нь Солонгосыг тайван замаар нэгтгэхэд урт удаан замыг туулах үүрэг хариуцлагыг хүлээдэг байгууллага байх ёстой гэдгийг Ли Ин Ён цохон дурджээ. Өмнө нь Үндэстнээ нэгтгэх яам үйл ажиллагаагаа идэвхгүй явуулдаг бөгөөд санаачилга гаргадаггүй гэх шүүмжлэлд өртдөг байсан юм. 

БНСУ-ын Ерөнхийлөгч Мүн Жэ Ин даваа гарагт Ли Ин Ёныг Үндэстнээ нэгтгэх сайдын албан тушаалд томилжээ. Энэ албан тушаалд түүний нэрийг дэвшүүлэхийг өмнө нь Үндэсний хурлын депутатууд албан ёсоор дэмжжээ.  

Хоёр Солонгосын харилцаа муудсантай холбоотойгоор Үндэстнээ нэгтгэх сайд Ким Ён Чоль албан тушаалаасаа огцрох тухайгаа мэдэгдсэн юм. Энэ үед буюу 6 дугаар сарын 3-нд Мүн Жэ Ин Үндэстнээ нэгтгэх сайдын албан тушаалд Ли Ин Ёны нэрийг дэвшүүлсэн байна.