БНСУ-ын Халдварт өвчин судлалын төвийн 10:00 цагийн мэдээллээр тус улсын хэмжээнд коронавирусаар халдварласан тохиолдол 8 дугаар сарын 26-ны 00.00 цагийн байдлаар 320-оор нэмэгдэж нийт 18265-д хүрэв. Шинээр илэрсэн 320 тохиолдлын 13 нь хилийн чанадаас зөөвөрлөгдөн ирсэн байна.

Нийт 14368 (+82) иргэн эдгэрсэн бол 312 (+2) иргэн нас барсан. Одоогийн байдлаар 1,849,506 (+23669) иргэнийг шинжилгээнд хамруулснаас 1,778,446 (+20916) иргэний хариу сөрөг гарч 52,795 (+2433) иргэний хариу хүлээгдэж байна. Тусгаарлалтад 3,585 (+236) иргэн байна.

Тус улсад өнгөрөгч 14-ний өдрөөс эхлэн Соүль хот болон Кёнги аймгийн хотуудад хэд хэдэн голомтот халдвар гарч өвчний тархалт хурдацтай явагдаж эхэлсэн билээ. Иймд Соүль хот болон Инчон хот, Кёнги аймгийн хотуудад хорио цээрийн дэглэмийг 1 шатаар ахиулан 2-р зэрэгт шилжүүлэх шийдвэр гаргаад байгаа бөгөөд цаашид халдвар тархаж эхэлснээс хойш 14 хоногийн хугацаанд тархалтыг барьж чадахгүй бол хорио цээрийн 3-р дэглэмд шилжүүлнэ гэж мэдэгдэж байв. 

Энэ 7 хоногийн эхний өдрүүд буюу 23, 24-ний өдрүүдэд 266 болон 280 тохиолдол бүртгэгдэж харьцангуй буурах төлөвтэй байсан болов ч өнөөдрийн байдлаар шинэ тохиолдол дахин 300-г давсан нь анхаарал татах болов.  Энэ 7 хоногт халдварын тохиолдол энэ мэтээр 300-с дээш өссөөр байгаа тохиолдолд хорио цээрийн 3-р дэглэмд шилжүүлэх нь тодорхой болоод байна...

Эх сурвалж : Naver.com