Цар тахалтай тэмцэх вакцин, эмийг ирэх онд эх орондоо гарган авахад дотоодын компаниуддаа дэмжлэг үзүүлэхийн тулд 170.7 тэрбум вон буюу 143 сая ам.долларыг зориулна гэж БНСУ-ын Эдийн засаг, сангийн яам өнөөдөр мэдээлжээ.

“Уг төсвөөс 31.7 тэрбум воныг вакцин гарган авахад шаардлагатай материалуудыг олоход, 7.4 тэрбум воныг амьтад дээр эмнэлзүйн туршилт хийхэд зарцуулна” гэж Сангийн яамнаас мэдээлжээ. Харин үлдсэн 171.4 тэрбум воныг ирэх онд хүний бие дээр эмнэлзүйн туршилт хийхэд зориулах ажээ.

Үүнээс гадна Засгийн газар халдварт өвчинтэй тэмцэхэд судалгааны байгууллагуудад дэмжлэг үзүүлэх үүднээс 200 их наяд воныг ирэх онд зарцуулна гэж тус яам мэдээлжээ.

Дэлхий даяарх эрдэмтэд шинэ коронавирусний эсрэг үр дүнтэй, аюулгүй вакциныг гарган авахаар ажиллаж байгаа юм. Мэргэжилтнүүдийн тооцоолж буйгаар, вакциныг ирэх оны дунд үеэс олноор үйлдвэрлэх төлөвтэй байгаа ажээ.

БНСУ коронавирусний эмийн нэгдүгээр шатны туршилтыг хүний бие дээр явуулах зөвшөөрлийг өнгөрсөн сард “Genexine” биотехнологийн компанид олгожээ.

Засгийн газар ирэх онд 27.2 тэрбум воныг судалгаа, хөгжүүлэлтийн ажилд зориулахаар төлөвлөж байгаа нь энэ оныхоос 12.3 хувиар өссөн байна. Ингэснээр судалгааны ажилд зориулах төсөв хоёр дахь жилээ дараалан хоёр оронтой тоогоор өсөх ажээ.