Онцгой байдлын ерөнхий газрын дэд дарга, хурандаа Б.Ууганбаяр Улсын онцгой комиссын шуурхай штабтай холбоотой мэдээллийг өглөө. Тэрбээр “Гаднын улсаас иргэдээ татан авах үйл ажиллагааг есөн сарын хугацаанд зохион байгууллаа. 100 удаагийн тусгай үүргийн нислэгээр 80 гаруй улс орноос иргэдээ татан авлаа. Мөн газраар иргэдээ татаж авах ажлыг зохион байгуулсан. Нийт 26335 иргэн Монгол Улсдаа иржээ” гэв.

Одоогоор 2800 гаруй иргэн ажиглах байранд байгаа аж. Улаанбаатар хотод 33 ажиглах байр байгаа бол орон нутагт найман ажиглах байранд иргэдийг ажиглан тандаж байна.

УОК орон нутагт коронавирустэй тэмцэх бэлэн байдлын сургалтыг явуулж байгаа билээ. Энэ талаар Онцгой байдлын ерөнхий газрын дэд дарга, хурандаа Б.Ууганбаяр “Орон нутгийн онцгой комиссын дэргэд байдаг шуурхай штабыг тохиолдлын удирдлагын тогтолцоогоор хангах, шуурхай хариу арга хэмжээний багийг чадавхжуулах сургалтыг есөн аймагт хийлээ. 21 аймагт сургалтаа хийх болно. Сургалтыг зохион байгуулахдаа шуурхай штаб болон шуурхай хариу арга хэмжээний багийг зохион байгуулж, голомтод очоод гүйцэтгэх үүрэгтэй нь холбоотой сургалтыг хийж байна” гэлээ.

Мөн УОК коронавирустэй тэмцэх төлөвлөгөөг зохион байгуулж, салбар дундын үйл ажиллагааны зохицуулалтыг боловсронгуй болгох талаар ажиллаж байгаа аж.

Сургалтын явц, үйл ажиллагаатай ДЭМБ-ын суурин зохицуулагч танилцан ажиллаж байгаа аж. Коронавирус болон бусад болзошгүй аюул осолтой тэмцэхэд хамтран үйл ажиллагаагаа зохицуулах, мэдээлэл солилцох зэргээр ажиллаж байна.