БНСУ-ын Халдварт өвчин судлалын төвийн мэдээллээр тус улсын хэмжээнд коронавирусаар халдварласан тохиолдол 12 дугаар сарын 16-ны байдлаар 1078-аар нэмэгдэж нийт 45442-д хүрэв. Сөүл хотын захирагчийн үүргийг гүйцэтгэгч Сё Жён Хюпийн мэдээлснээр, дуудлагын төв, хүргэлтийн компани, зоогийн газар, оёдлын үйлдвэр зэрэг олон ажилтантай газрууд, халдвар тархсан тохиолдолд олон хүн нас барж болзошгүй асрамжийн газар, хүүхдэд харах үйлчилгээний газруудын ажилтнуудыг шинжилгээнд хамруулах ажээ.

Сөүлийн засаг захиргааны мэдээллээр, нийслэл хотод даваа гарагт хийсэн, сайн дурын, үнэгүй шинжилгээнд хамрагдсан 2240 хүний 17-гийнх нь шинжилгээний хариу эерэг гарсан байна. БНСУ-д лхагва гарагт “COVID-19” халдварын 1078 шинэ тохиолдол илэрсэн нь тус улсад өдөрт бүртгэгдсэн хамгийн өндөр үзүүлэлт болжээ.