БНАСАУ Токиогийн Олимпын наадамд оролцохгүй байх шийдвэр гаргасныг үл харгалзан Солонгос хоорондын хэлэлцээг сэргээх чиглэлд үргэлжлүүлэн хүчин чармайлт гаргана гэж БНСУ-ын Үндэстнээ нэгтгэх яам өнөөдөр мэдэгджээ.

БНАСАУ тамирчдаа коронавирусний цар тахлаас хамгаалахын тулд энэ зун болох Токиогийн Олимпын наадамд оролцуулахгүй гэдгээ мягмар гарагт мэдэгдсэн юм. Энэ нь наадмаар дамжуулан хоёр талын хэлэлцээг сэргээхийг эрмэлзэж байсан БНСУ-ын найдлагыг үгүй хийжээ.

Харин Үндэстнээ нэгтгэх яамны төлөөлөгч сэтгүүлчдэд, “Ирэх долоодугаар сар хүртэл цаг хугацаа бий тул бид нөхцөл байдлыг харгалзан Солонгос хоорондын харилцааг сэргээхийн төлөө үргэлжлүүлэн хүчин чармайлт гаргах болно” гэж мэдээлсэн байна.

БНАСАУ 1988 оны Сөүлийн Олимпоос хойш анх удаа зуны Олимпод оролцохгүй байх шийдвэр гаргасан нь энэ ажээ.