АНУ-ын Ерөнхийлөгч Жозеф Байден тангараг өргөснөөс хойших эхний 100 хоногт "Ковид-19" цар тахлын эсрэг вакцинжуулалтын хүрээнд 200 сая тун вакцин хийжээ. Ингэснээр Жо Байдены засаг захиргаа товлосон хугацаанаасаа өмнө 200 сая тун вакцин хийх зорилтдоо хүрсэн байна.

Жозеф Байден бүрэн эрхийнхээ эхний 100 хоногт буюу дөрөвдүгээр сарын 29 гэхэд 200 сая тун вакцин хийхээр амлалт авч байсан юм. Америкийн Халдварт өвчний хяналт, урьдчилан сэргийлэх төвийн мэдээлснээр өчигдрийн байдлаар тус улсын 65 ба түүнээс дээш насны иргэдийн 80.6 хувь, 18 ба түүнээс дээш насны иргэдийн 51.5 хувь нь коронавирусний вакцины эхний тунг хийлгэжээ.

Нийт дүнгээр нь авч үзвэл, ажил хөдөлмөр эрхэлж байгаа насанд хүрэгчдийн 43 хувь нь вакцины эхний тунд хамрагджээ. Жо Байдены засаг захиргаа ажилтнаа коронавирусний вакцинд үнэ төлбөргүй хамруулж байгаа бизнесийн салбарын зарим байгууллагуудад татварын хөнгөлөлт олгож байгаа юм байна.

Тухайлбал, 500-гаас доош тооны ажилтантай бизнесийн байгууллагуудад уг хөнгөлөлтийг үзүүлэх бөгөөд татварын хөнгөлөлт ирэх есдүгээр сар дуустал үргэлжлэх юм байна.

АНУ-ын Ерөнхийлөгч вакцинжуулалт хурдтай явж байгаа хэдий ч амны хаалтаа тогтмол зүүх зэргээр цар тахлаас урьдчилан сэргийлэх алхамуудаа үргэлжлүүлэхийг иргэддээ уриалж байна.

Харин АНУ бусад улс орнуудад коронавирусний вакцин хандивлах нөхцөл одоохондоо бүрдээгүй байна. Цаашид дотоодын нөхцөл байдлаа харгалзан вакцинаа бусадтай хуваалцах чиглэлд ажиллах болно гэж Цагаан ордны тэргүүн мэдэгджээ