БНАСАУ-д нийт 36 мянга орчим хүнийг коронавирусний шинжилгээнд хамруулахад халдварын нэг ч тохиолдол илрээгүй байна гэж Дэлхийн эрүүл мэндийн байгууллага /ДЭМБ/ лхагва гарагт мэдээлжээ.

ДЭМБ-ын долоо хоног тутмын тайланд дурдсанаар, БНАСАУ-д долоодугаар сарын 30-наас наймдугаар сарын 5-нд 693 хүнд шинжилгээ хийснээр шинжилгээнд хамрагдсан хүний нийт тоо 35947-д хүрсэн байна.

“COVID-19”-ийн шинжилгээнд шинээр хамрагдсан хүмүүсийн 112-т нь шинж тэмдэг илэрснээс бүгд томуу төст өвчин юм уу амьсгалын замын цочмог өвчин туссан байжээ.

БНАСАУ улс орондоо коронавирусний халдвар тохиолдол огт бүртгэгдээгүй гэж мэдэгдсээр ирсэн боловч өнгөрсөн оны эхээр хилийн хатуу хяналт тогтоох зэргээр цар тахлын эсрэг шуурхай, хатуу арга хэмжээнүүдийг хэрэгжүүлсэн юм.

Дэлхий дахинд коронавирусний вакциныг тэгш хуваарилах зорилго бүхий “COVAX” хөтөлбөрөөр дамжуулан БНАСАУ хоёр сая орчим тун вакцин хүлээн авах төлөвтэй байгаа боловч одоогоор хараахан нийлүүлж эхлээгүй байна.