БНАСАУ-ын Хөдөлмөрийн намын /ХН/ Төв хорооны дөрөвдүгээр бүгд хурлаар одоогийн баримталж буй төрийн бодлогыг хянан нягталж, ирэх жилийн үйл хэргийн төлөвлөгөөний талаар хэлэлцэнэ гэж Солонгосын төв цахилгаан мэдээний агентлаг /KCNA/ өнөөдөр мэдээлжээ.

Энэ сарын сүүлээр бүгд хурал зохион байгуулах шийдвэрийг лхагва гарагт болсон ХН-ын Төв хорооны Улс төрийн товчооны хурлаар гаргасан байна. Энэхүү хурлын үеэр ХН-ын Ерөнхий нарийн бичгийн дарга Ким Жөн Ун энэ онд гарсан эдийн засгийн хөгжил дэвшилд сэтгэл хангалуун байгаагаа илэрхийлжээ.

“Эдийн засгийн тогтвортой менежмент, хөдөө аж ахуй, бүтээн байгуулалтын салбарт гарч буй ололт амжилт тэргүүтэй төрийн үйл хэрэгт “эерэг өөрчлөлтүүд” гарч байгаад баяртай байна. Ирэх он ч мөн энэ жилийнхтэй нэгэн адил ихээхэн хүчин чармайлт гаргасан өндөр ач холбогдолтой жил байх болно” гэж Ким Жөн Ун мэдэгдсэн байна.