БНСУ-ын автомашин үйлдвэрлэгч “Hyundai Motor” компани АНУ дахь үйлдвэртээ энэ оны сүүлээр байгальд ээлтэй тээврийн хэрэгслүүд үйлдвэрлэж эхлэхэд 370 тэрбум воны /300 сая ам.доллар/ хөрөнгө оруулна гэдгээ лхагва гарагт мэдэгджээ.

Тус компани нь Алабама муж улс дахь үйлдвэрийнхээ үйлдвэрлэлийн шугамуудыг “Santa Fe” автомашины хос хөдөлгүүртэй загвар, “Genesis GV70” спорт автомашины бүрэн цахилгаан загварыг үйлдвэрлэхээр болгож шинэчилнэ гэдгээ мэдэгдэлдээ дурдсан байна.

“Hyundai” АНУ-д цахилгаан тээврийн хэрэгслээ үйлдвэрлэх эхний алхмуудаа хийж байна. Бид Алабамад цахилгаан тээврийн хэрэгсэл үйлдвэрлэхэд багийн гишүүдийнхээ ур чадварыг харуулах боломж гарч байгаад баяртай байна” гэж Алабама дахь үйлдвэрийн тэргүүн Эрни Ким мэдэгджээ.

Монтгомери хотод хэрэгжүүлэх “Hyundai” компанийн төлөвлөгөө нь мужийн автомашины үйлдвэрлэлийг цахилгаан хувьсгал шинэчлэлтэд бэлтгэхэд хувь нэмрээ оруулахын сацуу “Drive Electric Alabama” тэргүүтэй стратегийн санаачилгатай уялдаж байгааг Алабама муж улсын захирагч Кей Айви онцлон тэмдэглэсэн байна.

АНУ-д хөрөнгө оруулалт хийх энэхүү төлөвлөгөө нь 2025 он гэхэд тус улсын үйлдвэрүүд, зах зээлд 7.4 тэрбум ам.долларын хөрөнгө оруулах “Hyundai Motor” группийн өргөтгөсөн төлөвлөгөөний нэгээхэн хэсэг юм. Тус групп нь энэ онд дэлхийн автомашины томоохон зах зээл болох АНУ-д долоон цахилгаан автомашинаа худалдаанд гаргахаар зорьж байгаа ажээ.