УИХ-ын 2024 оны чуулганы өнөөдрийн хуралдаанаар УИХ-ын дэд даргыг сонгох тухай асуудлыг хэлэлцэн шийдвэрлэв.

Монгол УИХ-ын чуулганы хуралдааны дэгийн тухай хуулийн 21 дугаар зүйлийн 21.1-т “УИХ-ын дэд даргыг тухайн УИХ-ын сонгуулийн дүнд бий болсон нам, эвслийн бүлэг тус бүрээс нэр дэвшүүлэн, ил санал хураалтаар сонгоно” хэмээн заасан байдаг.

Хуульд заасны дагуу УИХ дахь МАН-ын бүлгээс УИХ-ын гишүүн Хүрэлбаатарын Булгантуяаг УИХ-ын дэд даргад нэр дэвшүүлсэн талаар УИХ-ын гишүүн, тус бүлгийн дарга Л.Мөнхбаатар нэгдсэн хуралдаанд танилцуулав.

УИХ дахь АН-ын бүлгээс УИХ-ын гишүүн Бөхчулууны Пүрэвдоржийг УИХ-ын дэд даргад нэр дэвшүүлснийг УИХ-ын гишүүн, тус бүлгийн дарга О.Цогтгэрэл нар танилцууллаа.

Дараа нь санал хураалт явуулахад өнөөдрийн чуулганы нэгдсэн хуралдаанд оролцсон УИХ-ын 110 гишүүн санал нэгтэйгээр УИХ-ын гишүүн Х.Булгантуяа, Б.Пүрэвдорж нарыг УИХ-ын дэд даргаар сонголоо.

Иймд холбогдох УИХ-ын тогтоолын төсөл батлагдаж, Д.Амарбаясгалан хуралдаанд бүрэн эхээр нь уншиж танилцуулсан.

Үргэлжлүүлэн Байнгын хорооны бүрэлдэхүүнийг батлах тухай асуудлыг хэлэлцэж эхэлсэн ч УИХ дахь АН-ын бүлэг завсарлага авч буйг УИХ-ын гишүүн, УИХ дахь АН-ын бүлгийн дарга О.Цогтгэрэл мэдэгдэж, УИХ-ын дарга Д.Амарбаясгалан хуралдааныг түр завсарлуулахаар шийдвэрлэлээ.