СӨҮЛ. /BBC/. БНАСАУ-аас Их Британид суугаа Элчин сайдын орлогчоор ажиллаж байсан Тэ Ён Хо БНСУ-ын парламентын гишүүнээр сонгогдсон БНАСАУ-ын анхны дүрвэгч болжээ.

2016 онд гэр бүлийнхээ хамтаар эх орноосоо дүрвэсэн Тэ Ён Хо нь ийм шийдвэр гаргасан БНАСАУ-ын хамгийн өндөр албан тушаалтан юм. Тэрбээр сөрөг хүчний Нэгдмэл ирээдүй намаас Сөүл хотын Ганнам дүүрэгт өрсөлдсөн байна.

Тэ Ён Хо өөрийгөө ялсныг сонсоод нулимс унагасан бөгөөд тэрбээр 58.4 хувийн саналаар ялалт байгуулжээ. “Би БНАСАУ-ын нэр нөлөө бүхий хүмүүст ирээдүйд шинэ сонголт бий гэдгийг хэлмээр байна” гэж Тэ Ён Хо мэдэгджээ.

БНСУ коронавирусний халдварын тархалттай тэмцэж буйгаа үл харгалзан лхагва гарагт явуулсан парламентын сонгуулийн сонгогчдын ирц 66.2 хувьд хүрсэн нь 1992 оноос хойших хамгийн өндөр үзүүлэлт болсон юм.

Уг сонгуульд Ерөнхийлөгч Мүн Жэ Иний Ардчилсан нам түүхэн ялалт байгуулж, Үндэсний ассамблейн 300 суудлын 163-ыг нь авсан байна.