ПЁНЬЯН. /TASS/. БНАСАУ-ын үндэсний гол баяр буюу тус улсыг үүсгэн байгуулагч Ким Ир Сены мэндэлсний 108 жилийн ойг уламжлалт олон нийтийн арга хэмжээгүйгээр тэмдэглэж байна. Энэ жил коронавирус тархахаас урьдчилан сэргийлэх зорилгоор хорио цээр тогтоосны улмаас ийнхүү тэмдэглэх болжээ.

БНАСАУ-ын нийслэл Пёньян хотын гудамж, талбайд төрийн далбаа, баярын тухай суртал ухуулгын зурагт хуудсуудыг өлгөжээ. Пёньян хотын оршин суугчид энэ өдөр Мансудэ довцогт сүндэрлэх Ким Ир Сен болон Ким Жөн Ирын аварга том хүрэл хөшөөнд өглөөнөөс эхлэн цэцэг өргөдөг бөгөөд энэ жил цэцэг өргөх ёслол урьд жилүүдийнхээс даруухан болж байгаа ажээ. 

Өмнө нь “Нарны өдөр”-өөр Пёньяны гол талбайд олон тооны соёлын арга хэмжээ, хөгжмийн хамтлагуудын тоглолт, ардын хувцастай олон нийтийн бүжиг зохион байгуулдаг байсан бол одоо энэ талбайд маш цөөхөн хүн байна гэж ТАСС агентлагийн сурвалжлагч мэдээлжээ. Гудамжны найрал дуу, дуу бүжгийн чуулгын тоглолтын оронд чанга яригчаар хувьсгалын дуунууд, уран илтгэгчдийн эх орны тухай илтгэлүүдийг явуулж байгаа аж.  “Нарны өдөр”-ийн өмнө баярын уур амьсгал оруулахын тулд Пёньян хотын олон гудамжинд цэцгийн мандал байгуулжээ.

БНАСАУ-ын "мөнхийн ерөнхийлөгч" Ким Ир Сений дурсгалд зориулж, “Нарны өдөр” баярыг жил бүрийн дөрөвдүгээр сарын 15-нд тэмдэглэдэг уламжлалтай. Тэрбээр 1912 оны энэ өдөр мэндэлсэн юм.