Холимог тулааны UFC холбооны аварга Хабиб Нурмагомедовын аав Абдулманап Нурмагомедов Москва хотын эмнэлэгт сэхээн амьдруулах тасагт эмчлүүлж байгаа талаар бид мэдээлсэн. Сүүлийн хэд хоног тэрбээр ухаангүй байсан ч зүрхэнд нь хийсэн хагалгааны дараа ухаан орсон байна.

Абдулманап Нурмагомедов уушгины хатгалгаа гэж оношлогдон, Москвагийн эмнэлэгт хүргэгдсэн ч цус харвасан юм. Дагестанд байхад нь түүнийг коронавирусний шинжилгээнд оруулах гэсэн боловч татгалзсаар байсан. Харин Москвад хийсэн шинжилгээгээр КОВИД-19 туссан нь батлагджээ.

Түүнээс гадна Абдулманап Нурмагомедов дөрөвдүгээр сарын 24-нд анх эмнэлэгт хэвтэхдээ эмч нарын хэвтрийн дэглэм сахь гэсэн зааврыг үл хайхран, өрөөндөө бэлтгэл хийж, биеэ улам муутгасан гэнэ.