-Сүүлийн үед та юу хийж байна вэ. Сонгуульд бэлдээд завгүй байна уу?

-Тийм. Хөдөө орон нутгаар явж, иргэдтэй уулзаж байна. Маш шахуу төлөвлөгөөтэй явна.

-Таныг ХҮНамд байхад боловсролгүй гэдэг сөрөг пи-ар нэлээд явсан. Одоо нүүр бардам дипломоо үзүүлэх боломжтой болсон уу?

-Ирээд үз.

-О.Баасанхүү гишүүн Орхон аймгаас сонгогдсон болохоор түүний тойрогт таныг нэр дэвшинэ гэх мэдээлэл байна. Энэ үнэн үү?

-Үгүй.

-О.Баасанхүү намын удирдлагыг гартаа авах гэж МАХН дотор нэлээд үл ойлголцол үүссэн. Энэ асуудал шүүхээр эцэслэн шийдэгдсэн үү?

-Шийдэгдсэн. Анхнаасаа бүх зүйл тодорхой байсан. О.Баасанхүүгийн удирдсан хурал бол хууль бус гэдгийг шүүх нотолсон. 

-О.Баасанхүү Ардчилсан намд орсон тул танай нам парламентад суудалгүй болсон уу?

-Тийм, суудалгүй гэж ойлгож болно.

-Авлига албан тушаалын хэрэгт холбогдож байсан хүн нэр дэвших боломжгүй гэдэг Цэцийн шийдвэр гарлаа. Тиймээс МАХН-ын дарга Н.Энхбаяр нэр дэвшихгүй нь тодорхой боллоо гэж нийгэм харж байна. Үүнд ямар хариулт өгөх вэ?

-Эрх баригчид ухаан алдатлаа айж байна.

-Н.Энхбаярыг нэр дэвшүүлэхгүй байх сонирхол хэнд байх вэ?

-Манай хулгайч улстөрчид Н.Энхбаярыг нэр дэвшүүлэхгүй байхын төлөө өдөр, шөнөгүй зүтгэж байна.

-Танай намын мөрийн хөтөлбөр нэлээд шүүмжлэл дагууллаа. Ялангуяа орон сууцны асуудал. Үнэхээр боломжтой зүйл гэж та бүхэн үзэж байгаа юу?

-Боломжтой.

-Ирэх дөрвөн жилд эдийн засгийн нөхцөл байдал хүнд байна гэдэг дүгнэлтийг эдийн засагчид дуу нэгтэй хэлж байна. Гэтэл цалинг 5 сая болгоод зогсохгүй байр өгнө гэхээр нэг л санаанд бууж өгөхгүй юм?

-Эрх баригчид хулгайгаа зогсоовол манай намын мөрийн хөтөлбөр хэрэгжих бүрэн боломжтой.

-Энэ сонгуулиар нэлээд олон бие даагч өрсөлдөнө гэдгээ мэдэгдлээ. Бие даагчид ямбыг нь эдэлдэг ч ялыг нь үүрдэггүй гэдэг шүүмжлэл байдаг шүү дээ. Та өмнө нь бие даагч байсан хүний хувьд ямар хариулт өгөх вэ?

-Би 2012-2016 оны парламентад хүчтэй бие даагч байсан юм шүү.

-Ийм олон бие даагч өрсөлдөж байгааг та юу гэж дүгнэх вэ?

-Үнэхээр олон бие даагч өрсөлдөх хүсэлтээ өгсөн байна билээ. Би өөрөө бие даагчаар сонгогдож байсан учраас тэднийг үгүйсгэмээргүй байна.

-Танай нам энэ сонгуульд хэрхэн оролцох талаар судалгаа гарсан уу?

-Гарсан. Одоогоор би хөдөө орон нутагт уулзалттай явж байгаа тул дэлгэрэнгүй мэдээлэл өгөх боломжгүй байна.