Өнөөдөр Баянзүрх дүүргийн 4 дүгээр хорооны нутаг дэвсгэрт олон улсын стандарт бүхий биеийн тамирын болон хөлбөмбөгийн талбай ашиглалтад орлоо.

Энэ газар овон товон бүхий, улаан шороотой сул талбай байсан бөгөөд хөлбөмбөгийн талбай байгуулна гээд 20 шахам жил өнгөрөөд байсан юм. Талбайн нээлтийн үеэр Нийслэлийн засаг дарга, Улаанбаатар хотын захирагч С.Амарсайхан: “20 гаруй жил эзэнгүй орхигдож, хаягдсан талбайг бид буцаан авсан. Ингээд дүүрэг бүрд биеийн тамирын цогц талбай байгуулна гэсэн зорилт тавьж ажилласны дүнд олон сайхан спортын, амралт чөлөөт цагаа зөв боловсон өнгөрүүлэх талбай бий болж байна. Үүний нэг нь өнөөдөр нээлтээ хийлээ. Энэ газар өмнө нь ямар байсныг ард иргэд маань мэдэж байгаа. Хүн явахын аргагүй улаан шороо эргэлдсэн газар байлаа. Энэ бүтээн байгуулалтыг санаачилсан, гардан гүйцэтгэсэн, дэмжиж ажилласан бүх хүмүүст чин сэтгэлийн талархал илэрхийлье” гэлээ.