Коронавирусний халдвартай 16 хүн эдгэрч, Беларус улсаас ирсэн дөрвөн жолоочоос халдвар илэрснийг мэдээлсэн. Тэгвэл коронавирусний өвчлөлтэй холбоотой  мэдээллүүдийг тодотгох тоонуудыг  хүргэе.

Өчигдөр буюу 17-ны өдөр   ХӨСҮТ-ийн 2 лаборатори, Дархан-Уул аймгийн салбар 1 лабораторид нийт 363 шинжилгээ /PCR/ хийхэд дөрвөн хүнд "Ковид-19" халдвар илэрчээ.

Сэлэнгэ аймгийн Алтанбулаг боомтоор ирсэн ачаа тээврийн 20 жолоочийн шинжилгээгээр Беларус улсын дөрвөн жолооч халдвартай болох нь батлагдсан байна.

Сөүл-Улаанбаатар чиглэлийн тусгай үүргийн онгоцоор ирсэн 255 иргэнээс таван хүн ХӨСҮТ-д, 12 хүн Цэргийн төв эмнэлэгт, бусад нь ажиглах байруудад тусгаарлагджээ.

 Бусад шинжилгээ:

• ХӨСҮТ-д тусгаарлагдсан 8 хүн /давтан/,
• Ажиглах байранд тусгаарлагдсан 250 хүн /Сөүл-Улаанбаатар чиглэлийн онгоцоор ирсэн/,
• Тандалт судалгааны зорилгоор Баянхонгор аймаг болон нийслэлийн Сүхбаатар дүүргийн нэгдсэн эмнэлэг, Өрхийн эүүл мэндийн төвүүдээс цуглуулсан 70 сорьц,
• Сэлэнгэ аймагт тусгаарлагдсан 6 хүн /давтан,
• Алтанбулаг боомтоор ирсэн ачаа тээврийн 16 жолоочийн шинжилгээнд халдвар илрээгүй байна.

ХӨСҮТ-д эмчлүүлж байсан 16 хүн эдгэрч, өнөөдөр дараагийн тусгаарлалт руу шилжиж байна. Тухайлбал:

 ОХУ-ын цэргийн болон бусад сургуулийн 19-23 насны 15 оюутан, мөн 35 настай 1 оюутан байгаа аж. Эмэгтэй 2, эрэгтэй 14 хүн байна.

 Эмчилгээний хугацаа 18-65 хоног үргэлжилжээ.

Орон нутгийн 17 чиглэлд галт тэргээр зорчсон 5000 гаруй хүнд тандалт, судалгаа хийж, асуумж авахад халдвар илрээгүй байна.

Өнөөдрийн байдлаар, ХӨСҮТ-д 124 хүн тандалт, судалгаа, хяналт, эмчилгээ, шинжилгээнд хамрагдаж байна.

Монгол Улсад гаднаас зөөвөрлөгдөн орж ирсэн коронавируст "Ковид-19" халдварын нийт батлагдсан тохиолдол 201 байна. Үүнд:

ХӨСҮТ-д эмчлүүлж эдгэрсэн 127 хүн байгаа бол, өдгөө эмчилгээ, ажиглалтад 74 хүн хамрагдаж байна.

Биеийн байдал хөнгөн 69, хүндэвтэр 5 хүн байгаа аж.