БНСУ-ын Ерөнхийлөгч Мүн Жэ Ин энэ сарын сүүлээр цахим дээд хэмжээний уулзалт зохион байгуулж, Европын Холбооны /ЕХ/ удирдагчидтай шинэ коронавирусний халдвар болон Солонгосын хойгийн асуудлын талаар хэлэлцэхээр болжээ.

Мүн Жэ Ин Европын зөвлөлийн тэргүүн Шарль Мишель, Европын Комиссын тэргүүн Урсула фон дер Лайен нартай зургадугаар сарын 30-нд уулзана гэж Хөх ордны хэвлэлийн төлөөлөгч Кан Мин Сёк өнөөдөр мэдээлсэн байна.

БНСУ-ын Ерөнхийлөгч энэ он гарсаар анх удаа хоёр талын дээд хэмжээний уулзалт хийх гэж буй нь энэ ажээ. “Талууд 2020 оны эхний хагаст Сөүл хотод уулзахаар төлөвлөж байсан боловч “COVID-19”-ийн тархалтын улмаас эхний ээлжинд цахимаар хуралдахаар шийдвэрлэсэн” гэж хэвлэлийн төлөөлөгч мэдээлжээ.

Удахгүй болох уулзалтаар талууд коронавирусний халдвартай тэмцэх арга хэмжээнүүд болон БНАСАУ-ын асуудал зэрэг тулгамдсан асуудлуудын талаар хэлэлцэхээр төлөвлөсөн байна.