. Дэлхий дахинд сүүлийн 24 цагийн хугацаанд шинэ коронавирусний халдварын 237 мянган шинэ тохиолдол бүртгэгдсэн буюу цар тахал эхэлснээс хойших хамгийн олон хүн өвчилсөн өдөр байсан талаар ЭМЯ-ны өнөөдрийн ээлжит хэвлэлийн хурлын үеэр тус яамны хэлтсийн дарга Д.Нарангэрэл онцлов. 

Тэрбээр, "ДЭМБ-ын захирал ээлжит хэвлэлийн хурлынхаа үеэр, эрүүл мэнд тансаглал биш гэдгийг онцлон улс орнууд цар тахлыг даван туулахын тулд дараах арга хэмжээг авах хэрэгтэй хэмээсэн. Үүнд засгийн газрын хүчтэй манлайлал, олон нийтийн оролцоо буюу амьдралын шинэ хэв маяг болох амны хаалт зүүх, хүн хоорондын зай барих зэргийг хэвшүүлэх. Түүнчлэн халдварыг эрт илрүүлж, эрт тусгаарлах нь өвчтөний амь насыг аврах чухал зэвсэг” хэмээн тодотгов.

Өнөөдрийн байдлаар, шинэ коронавируст халдвар дэлхийн 216 улс орон, бүс нутагт бүртгэгдэж, 14 сая 123 мянган хүн өвчилж 596 мянган хүн амиа алдсан байна.