Засгийн газар өнөөдөр /2020.02.13/ ээлжит бусаар хуралдлаа. Шуурхай хуралдаанаас БНХАУ-аас ирэх болон тус улс руу явах бүх нислэг, галт тэрэгний хөдөлгөөнийг зогсоох талаар хэлэлцэж, маргаашаас БНХАУ чиглэлийн бүх нислэг, галт тэргийг зогсоох шийдвэр гаргажээ.

Ингэснээр БНХАУ-аас аль ч улсын иргэн Монгол Улс руу нэвтрэх боломжгүй болж байгаа ба монгол иргэдийг хүндэтгэх шалтгаангүйгээр нэвтрүүлэхгүй аж. Хэрэв зайлшгүй тохиолдолд Монгол Улсын иргэдийг авч ирэх шаардлага гарвал тусгай баг явуулж, ганц нэгээр бус бөөнөөр нь авахаар төлөвлөжээ. Ингэхдээ тээврийн зардлыг тухайн иргэд гаргахаар зохицуулалт хийхээр болсон байна.

Засгийн газрын өчигдрийн ээлжит хуралдаанаас гаргасан коронавирусийн халдвараас сэргийлэх шийдвэрийн дагуу төрийн болон хүчний байгууллагууд өндөржүүлсэн бэлэн байдалд шилжин ажиллаж байгаа билээ.

Засгийн газрын АЛБАН МЭДЭЭ

2020 оны 02 дугаар сарын 14-ний өдрөөс эхлэн БНХАУ-тай хил залгаа боомтуудаар орох, гарах агаарын болон төмөр замын зорчих хөдөлгөөнийг зогсоолоо.

Энэ нь БНХАУ-аас ирэх болон тус улсад зорчихыг бүрэн хориглож байна гэсэн үг юм. Гэхдээ бараа бүтээгдэхүүний экспорт, импорт хэвийн үргэлжилнэ.

БНХАУ-д зайлшгүй шаардлагаар зорчихоор галт тэрэг, онгоцны тасалбар захиалсан бол “МИАТ”, “Улаанбаатар төмөр зам” компани мөнгийг нь ямар нэгэн шимтгэлгүйгээр буцаан олгоно. Засгийн газрын тогтоолын дагуу  2020 оны 02 дугаар сарын 01-нээс хойш БНХАУ-ын иргэд болон тус улсаар дамжин Монгол Улсад зорчих иргэдийг нэвтрүүлээгүй байна.

Засгийн газар БНХАУ-д байгаа монгол иргэдээ 2020 оны 02 дугаар сарын  06-ны өдөр хүртэл бүх боомтоор, мөн өдрөөс хойш зөвхөн Замын-Үүд болон Буят-Ухаа боомтоор хүлээн авсан. Хилээр зорчих хөдөлгөөнийг бүрэн зогсоосноос хойш БНХАУ-д байгаа монгол иргэдийг тусгай нислэгээр авчрах шаардлага гарч болзошгүй. Энэ тохиолдолд шаардагдах зардлыг тухайн иргэн өөрөө хариуцах бөгөөд ирсэн тохиолдолд тусгаарлана.