Америкийн “Pfizer” компани коронавирусний вакцинаа бүртгүүлэх хүсэлтээ Японы Эрүүл мэндийн яаманд өнөөдөр гаргажээ. Энэ тухай тус компанийн Япон дахь төлөөлөгчийн газрын цахим хуудсанд мэдээлсэн байна.

““COVID-19”-ийн тохиолдол Японд төдийгүй дэлхийн бусад оронд ч өссөөр байна. Бид улс орон болгоны зохицуулагч байгууллагатай хамтран ажиллаж, аюулгүй, үр дүнтэй вакциныг хүргэх хүчин чармайлтаа үргэлжлүүлж байна. Зөвшөөрөл авсан даруйдаа бид Японы ард түмэнд вакцинаа шуурхай хүргэнэ" гэж “Pfizer Japan” компанийн гүйцэтгэх захирал Акихиса Харада онцлон тэмдэглэжээ.

“Pfizer”-ийн хүсэлтийг Японы Засгийн газар баталбал уг вакцин нь тус улсад хэрэглэхийг зөвшөөрсөн коронавирусний анхны вакцин болно. Японы эрх баригчид “COVID-19”-ийн вакциныг иргэддээ үнэ төлбөргүй хийх хуулийн төслийг 12 дугаар сарын эхээр эцэслэн баталсан юм. Тус улсад вакцинжуулалт ирэх оны хавар эхэлж магадгүй бөгөөд үүнээс өмнө эрүүл мэндийн байгууллагуудын зохих бэлтгэлийг хангах аж. 

Японы эрх баригчид өмнө нь Их Британи-Шведийн “AstraZeneca”, Америкийн “Pfizer”, “Moderna” компаниудтай коронавирусний вакцин худалдан авах гэрээ байгуулсан юм. Тус улсад коронавирусний халдварын тархалтын байдал 11 дүгээр сарын эхэн үеэс улам дордсон байна. Халдварын нийт тохиолдлын тоо 190 мянга давсан бол  2800 гаруй хүн нас баржээ.