УИХ-дахь МАН-ын бүлэг өнөөдөр /2021.01.25/-ийн ээлжит хуралдаанаар дөрвөн асуудлыг хэлэлцлээ. Тодруулбал, Монгол Улсын Ерөнхий сайдад нэр дэвшигч Л.Оюун-Эрдэнэ болон Шүүхийн тухай, Засаг захиргаа, нутаг дэвсгэрийн нэгж, түүний удирдлагын тухай, Авилгын эсрэг хуулиудад тавьсан Ерөнхийлөгчийн хоригуудыг авч хэлэлцлээ.

Хурлын шийдвэрийн талаар УИХ дахь МАН-ын бүлгийн дарга Д.Тогтохсүрэн болон бүлгийн гишүүд сэтгүүлчдэд мэдээлэл өглөө. Д.Тогтохсүрэн “УИХ дахь МАН-ын бүлгийн хуралдаанаар Монгол Улсын 32 дахь Ерөнхий сайдад Л.Оюун-Эрдэнийг дэмжих асуудлыг хэлэлцлээ. Бүлгийн гишүүд нэр дэвшигчээс асуулт асууж, үг хэлсэн.

Үүний дараа Монгол Улсын Ерөнхийлөгчийн хоригуудыг хэлэлцлээ. Ерөнхийлөгч Х.Баттулга Авилгын эсрэг хуулийн нэмэлт, өөрчлөлтөд хэсэгчлэн хориг тавьсан. Уг хуулийн төсөлд хоёр өөрчлөлт орсон. Нэгдүгээрт, АТГ-ын даргыг Монгол Улсын Ерөнхийлөгчийн санал болгосноор УИХ хэлэлцэж томилдог байсныг Ерөнхий сайдын санал болгосноор УИХ-аас томилдог болгож өөрчилсөн заалтад Ерөнхийлөгч хориг тавьсан. Хоёрдугаарт, АТГ-ын дэд даргыг Ерөнхийлөгчийн санал болгосноор томилдог байсныг АТГ-ын даргын санал болгосноор УИХ-аар хэлэлцэж томилдог болсон заалтад хориг тавьсан. Үүнийг МАН-ын бүлэг хүлээж авах боломжгүй гэж үзлээ. Үүнд, хоёр үндэслэл бий. Нэгдүгээрт, энэхүү хуулийн төслийг Үндсэн хуулийн дагуу өөрчилсэн. Өнгөрсөн онд баталсан Үндсэн хуулийн өөрчлөлтөөр Монгол Улсын Ерөнхийлөгчид Үндсэн хуулийн 33-р зүйлд зааснаас өөр чиг үүргийг хуулиар олгохыг хориглосон. 33-р зүйлд найман чиг үүрэг бий. Үүнийг л Ерөнхийлөгч хэрэгжүүлнэ гэж заасан юм. Хоёрдугаарт, Үндсэн хуульд гэмт хэрэг, урьдчилан сэргийлэх нь зөвхөн Засгийн газрын үүрэг байх талаар тусгасан. Энэ бол Үндсэн хуулийн үзэл санааны дагуу хийсэн өөрчлөлт юм. Сүүлийн үед АТГ-ыг Засгийн газрын харьяанд очсон мэт ярьж байна. Энэ бол өрөөсгөл ойлголт” гэж тайлбарлав .

 Б.Энхбаяр: Шүүхийн тухай хуульд Ерөнхийлөгчийн эрхүүд туссан учраас хориг хүлээж авах боломжгүй

Монгол Улсын Ерөнхийлөгч 2021 оны нэгдүгээр сарын 25-ны өдөр Шүүхийн тухай хуульд хэсэгчлэн тавьсан хоригийг МАН-ын бүлэг хүлээж авах боломжгүй гэж үзсэн талаар УИХ-ын гишүүн Б.Энхбаяр тайлбарлалаа. Тэрбээр “УИХ дахь МАН–ын бүлгийн хуралдаанаар Ерөнхийлөгчийн хоригийг хэлэлцэж, хүлээн  авах боломжгүй гэж үзлээ. Үүнд хоёр үндэслэл бий. Нэгдүгээрт, Шүүхийн тухай хуулийг батлахад Монгол Улсын Ерөнхийлөгч Х.Баттулга идэвхитэй оролцсон. Хэлэлцүүлгийн явцад ажлын хэсэгт 36 зүйл бүхий 100 гаруй хуудас санал ирүүлсэн. Ажлын хэсэг 98 хувийг хүлээн авч баталсан. Хоёрдугаарт , Ерөнхийлөгчийн шүүх эрх мэдэлд оролцдог эрхийг УИХ, олонхи булааж авсан гэж ойлгож байна. Ерөнхийлөгчийн бүх шатны шүүгч нарыг томилох эрх нь хэвээр, Улсын Дээд шүүхийн Ерөнхий шүүгчийг томилох бүрэн эрх нь хэвээр байгаа. Иймд Ерөнхийлөгчийн  хэсэгчилсэн хоригийг хүлээж авах боломжгүй гэж УИХ дахь МАН-ын бүлэг үзлээ” гэж тодотгосон юм.

 Ж.Сүхбаатар: Төрөөс шийдвэр гардаг ч орон нутагт гүйцэтгэл сул байдаг учраас Ерөнхий сайд Засаг дарга нараа өөрөө томилдог болсон

Монгол Улсын Засаг захиргаа, нутаг дэвсгэр, түүний удирдлагын тухай хууль болон хамт өргөн мэдүүлсэн хуулийн төслүүдэд Монгол Улсын Ерөнхийлөгчийн хэсэгчлэн тавьсан хоригийг МАН-ын бүлэг хүлээж авах боломжгүй талаар УИХ-ын гишүүн Ж.Сүхбаатар тайлбар өглөө. Тэрбээр “Гүйцэтгэх засаглалын оролцоо сул байна гэж олон жил ярьсан. Төр засгаас шийдвэрүүд гардаг ч орон нутаг, үндэсний түвшинд гүйцэтгэл сул байдаг. Тиймээс Ерөнхий сайд дээд шатны Засаг дарга нараа өөрөө томилдог болгож удирдлагын түвшинг босоо тогтолцоонд шилжүүлэхээр хууль эрх зүйн орчинг бүрдүүлсэн. Мөн төрөөс тавих хяналтыг сайжруулж байгаа юм. Монгол Улсын Ерөнхийлөгчийн хоригт төрийн байгууламжийн хувьд нэгдмэл байна гэдэг зарчмыг нэгжийн хуулийн зорилго болгосон байна. Энэ  буруу гэж хоригт тайлбарласан. Үнэн хэрэгтээ бид Үндсэн хуульд зааснаар нэгтгэж өгсөн. Нэгдсэн улсын зарчмаар бодлогоо цаашид үргэлжлүүлж хууль үйлчлэх ёстой гэж үзсэн. Иймд Ерөнхийлөгчийн хоригийг хүлээж авах боломжгүй гэж үзлээ”  гэсэн гэж УИХ дахь Монгол Ардын намын бүлгээс мэдээллээ.