Зэвсэгт хүчний жанжин штаб /ЗХЖШ/-аас “Хатан ижий” өргөмжлөлийг 9 ээжид гардуулах бөгөөд уг ёслолыг 2021 оны 3 дугаар сарын 3-ны өдөр зохион байгуулна.

Энэхүү хүндэтгэлийн ёслол нь ЗХЖШ-аас Батлан хамгаалах асуудал эрхэлсэн төрийн захиргааны төв байгууллагын 110, орчин цагийн Зэвсэгт хүчин үүсэн байгуулагдсаны 100 жилийн ойн хүрээнд зохион байгуулж буй ажлын нэг юм байна.

“Хатан Ижий” өргөмжлөл нь Батлан хамгаалах салбар, Зэвсэгт хүчинд олон жил үр бүтээлтэй ажилласан, олон хүүхэд төрүүлж өсгөсөн, гэр бүл үр хүүхдүүд нь үе дамжин Зэвсэгт хүчинд алба хааж яваа, баялаг түүх намтартай, бахархан дуурайх гэгээн үйлстэй ижий нарыг алдаршуулан өргөмжлөх, тэдний гавьяа зүтгэл, гэр бүлийн зөв хандлагыг олон нийтэд сурталчлах зорилготой юм.

Ташрамд дуулгахад, ЗХЖШ, ЦДБЭЧ хамтран залуу, халуун насаа Зэвсэгт хүчнийхээ хөгжил, цэцэглэлтэд зориулсан, үр хүүхдүүдээ ч энэ замнал мөрөөр нь хөтөлсөн ижий нарыг алдаршуулахаар "Хатан ижий"-г зургаа дахь жилдээ зохион байгуулж байгаа бөгөөд энэ хугацаанд 46 ээжийг алдаршуулан өргөмжилжээ.