Цар тахлын үеийн нөхцөл байдалтай холбогдуулан Эрүүл мэндийн яамнаас өнөөдөр /2021.02.02/ Улаанбаатар хотод хатуу хөл хориог 14 хоног тогтоох саналаа Улсын Онцгой комисст албан ёсоор хүргүүллээ. 

Улмаар Улсын Онцгой комисс өнөөдөр 18:00 цагаас шуурхай хуралдаан зарлаад байна. Хуралдаанаар хөл хорио тогтоох эсэх асуудлыг хэлэлцэж, саналаа Засгийн газарт хүргүүлэхээр болжээ.

Харин хуралдаанаас гаргасан шийдвэрийг маргааш /2021.02.03/ Засгийн газрын ээлжит хуралдаанаар хэлэлцэж, эцэслэх юм. Засгийн газрын ээлжит хуралдааныг маргааш 08:00 цагт Төрийн ордонд товлоод байна.

Нийслэлд 2021 оны нэгдүгээр сарын 11-ний өдөр Бүх нийтийн бэлэн байдлын зэрэг буурснаас хойш 15 голомт шинээр илэрч, дотоодын халдварын тохиолдол 1,323 болсон талаар Эрүүл мэндийн яамнаас мэдээлээд байгаа билээ.