УУХҮ-ийн дэд сайд О.Батнайрамдал БНЭУ-ын газрын тос, байгалийн хийн дэд сайд Тарун Капуртай цахимаар уулзав.

Сайд Тарун Капур энэ уулзалт нь 2020 оны 12 дугаар сард цахимаар зохион байгуулсан Монгол, Энэтхэгийн Хамтын ажиллагааны хамтарсан хорооны 7 дугаар хуралдаан, өнгөрсөн сард Монгол Улсын ЗГХЭГ-ын дарга Л.Оюун-Эрдэнэ, УУХҮ-ийн сайд Г.Ёндон нар БНЭУ-ын Газрын тос, байгалийн хийн сайд Д.Прадхантай хийсэн уулзалтын үргэлжлэл гэдгийг тэмдэглээд, энэ  оны нэгдүгээр сарын 29-нд “Газрын тос боловсруулах үйлдвэрийг дэмжих тухай”хуулийг УИХ-аар батлуулсанд баяр хүргэж, Монгол Улсын Засгийн газар, УУХҮЯ энэ төсөлд онцгой ач холбогдол өгч байгаад талархал илэрхийллээ.

УУХҮ-ийн дэд сайд О.Батнайрамдал газрын тос боловсруулах үйлдвэр байгуулах төсөл нь төлөвлөлтөөс бүтээн байгуулалтын үе шатанд шилжсэнийг дурдаад, “Газрын тос боловсруулах үйлдвэрийг дэмжих тухай”хуулийг батлуулснаар үйлдвэрийн бүтээн байгуулалтыг эрчимжүүлж, үйлдвэрийг төлөвлөсөн хугацаанд нь ашиглалтанд оруулах эрх зүйн орчин бүрдүүлж байгааг онцлов.

Уулзалтын үеэр дамжуулах хоолой байгуулах төслийн нарийвчилсан ТЭЗҮ, инженерчлэл, худалдан авалт, барилга угсралтыг гүйцэтгэх компанийг сонгон шалгаруулах олон улсын нээлттэй тендер зарлахад Энэтхэгийн талаас дэмжлэг үзүүлэх, EPC-2, EPC-3 багцын ерөнхий гүйцэтгэгчийг шалгаруулах ажлыг эрчимжүүлэхэд хоёр тал идэвхтэй хамтран ажиллахыг хүслээ.

Дэд сайд Т.Капур Монголын талаас тавьсан хүсэлтийг холбогдох байгууллагуудад уламжлан хамтран ажиллахад бэлэн гэдгээ илэрхийлсэн юм.

Түүнчлэн, хоёр улсын худалдаа, эдийн засгийг хөгжүүлэх зорилгоор сайн чанарын коксжих нүүрсийг Монгол Улсаас БНЭУ-д нийлүүлэхэд хамтран ажиллах боломжийн талаар санал солилцлоо.