Монголын морин спорт уяачдын холбооны 25 жилийн ой энэ жил тохиож байгаа бөгөөд тус ойг угтаж гурван аймагт хурдан морины уралдаан зохион байгуулахаар болсон билээ.

Тодруулбал, энэ сарын 6-8-ны хооронд Дорнод аймгийн Хөлөнбуйр, Сэлэнгэ аймгийн Сүхбаатар, Ховд аймгийн Ховд суманд зохион байгуулж байна.

Энэ жилийн Улсын баяр наадмыг хойшлуулж, ирэх жил зохион байгуулах шийдвэрийг Засгийн газраас гаргасан. Гэсэн хэдий ч УОК-оос зөвшөөрөл авч, спортын тэмцээн уралдааныг үзэгчгүй зохион байгуулж болно гэж Засгийн газраас мэдэгдсэн билээ.

Баруун бүсийн уралдааны сонгомол дээд насны морьд дөнгөж сая барианд орж, Төв аймаг Баян-Өнжүүл сумын харьяат С.Баярсайханы бор морь түрүүлэв.

Аман хүзүүнд тус нутгийн алдарт хээр азарга, айргийн гуравт Төв аймгийн Заамар сумын харьяат Ч.Уламбаярын хүрэн, айргийн дөрөвт манлай уяач Б.Ерөөлтийн хул, айргийн тавд Амармэндийн хээр морь хурдалжээ.