БНАСАУ-ын удирдагч Ким Жөн Ун үерийн гамшигт нэрвэгдсэн зүүн нутгийн мужид байгалийн гамшгийн уршгийг арилгахад төрийн дэмжлэг үзүүлэхийг үүрэг болгосон талаар тус улсын төрийн мэдлийн хэвлэл мэдээллийн хэрэгсэл ням гарагт мэдээлжээ.

Өмнөд Хамгён мужид наймдугаар сарын 1-2-нд хүчтэй аадар бороо орсны улмаас тариалангийн талбайнуудын ихээхэн хэсэг усанд автаж, 1170 орчим байшин барилга сүйдэж, 5000 орчим хүнийг нүүлгэн шилжүүлсэн гэж БНАСАУ-ын хэвлэлүүд өмнө нь мэдээлсэн юм.

Үүнтэй холбоотойгоор мужийн Хөдөлмөрийн намын Цэргийн хороо пүрэв гарагт хуралдаж, холбогдох газруудад бүтээн байгуулалтын хүчнүүдийг яаралтай байршуулахтай холбоотой техникийн асуудлуудын талаар хэлэлцсэн гэж Солонгосын төв цахилгаан мэдээний агентлаг /KCNA/ мэдээлжээ.

Удирдагч Ким Жөн Ун уг хуралд оролцоогүй боловч Өмнөд Хамгён мужийн сэргээн босголтын үйлсэд шаардлагатай эд материал, санхүүгийн дэмжлэг үзүүлэхийг үүрэг болгосон гэж “KCNA” агентлаг мэдээлсэн байна. Мөн уг хурлаар мужийн сэргээн босголтын асуудал хариуцсан баг байгуулж, энэ чиглэлийн ажлыг 10 дугаар сарын 10-нд болох нам үүсэн байгуулагдсаны ойн баяраас өмнө дуусгахаар шийдвэрлэжээ.

БНАСАУ-д өнгөрсөн зун олон хар салхинаас үүдэн хүнсний ноцтой хомсдол үүссэн бөгөөд ийм нөхцөл байдал дахин давтагдахаас урьдчилан сэргийлэхийн тул үерийн аюулаас урьдчилан сэргийлэх хүчин чармайлтаа эрчимжүүлэх болоод байгаа юм. Мөн өнгөрсөн долоо хоногт төрийн хэвлэл будааны тариалангийн гол бүс болох баруун өмнөд нутагт үерийн аюул нүүрлэх өндөр аюултай байгааг анхааруулсан байна.