Францын Ерөнхийлөгч Эммануэль Макрон, ОХУ-ын төрийн тэргүүн Владимир Путин нар Афганистаны асуудлаар үйл ажиллагаагаа уялдуулахаар тохиролцлоо гэж Елисейн ордон мэдээлэв.

Хоёр орны Ерөнхийлөгч нар пүрэв гарагт утсаар ярьсан бөгөөд бүтэн хагас цаг гаруй үргэлжилсэн байна.

“Э.Макрон, В.Путин нар Афганистаны байдал, нүүлгэн шилжүүлэлтийн талаар, мөн мансууруулах бодис болон зэвсгийн худалдаатай тэмцэх, олон улсын террорист хөдөлгөөнөөс салах, эмэгтэйчүүдийн эрхийг хүндэтгэх зэрэг “Талибан”-тай холбоотой бидний эн тэргүүний хүлээлтийг хэлэлцлээ” гэж хэвлэлийн мэдээнд онцлон тэмдэглэжээ.

“Ерөнхийлөгч нар мөн хоёр талын үндсэн дээр төдийгүй НҮБ-ын Аюулгүйн Зөвлөл болон “G20” -ийн хүрээнд үйл ажиллагаагаа ойрын өдрүүдэд нягт уялдуулахаар тохиролцов” гэж Францын удирдагчийн засаг захиргаа мэдээлсэн байна.